Bishimbaev: "10 sotyq? Suraǵan adamdardyń bárine jer bere almaimyz"
«Qazirgi ýaqytta keibir azamattar memleket jer bermeidi eken nemese beredi eken degen árqily pikir aityp júr. Ázirshe bul baǵytta zańǵa eshqandai ózgeris engizilgen joq. Qazaqstan azamatynyń jeke úi salý úshin jer ýchaskesin alýǵa tolyq quqyǵy bar ekenin bilesizder. Ondai quqyq zańda naqty belgilengen. Biraq qazir ekonomikalyq jaǵdaiǵa bailanysty ánsheiin suraǵan adamǵa jer bere berýge bolmaidy. Óitkeni jer berý úshin, áýeli oǵan infraqurylym tartylýy kerek. Atap aitsaq, aýyz sý, elektr qýaty jáne taǵy basqa qajetti qurylymdar. Mine, osy infraqurylymdy tartýǵa biýdjette qarajat bolmaǵandyqtan biz osy mólsherdi qysqartqanbyz. Al aldaǵy ýaqytta qarajat máselesi sheshilse, jer suraǵan azamattarǵa jer telimi beriledi»,- dedi ministr.
Jańa qyzmetke taiaýda ǵana taǵaiyndalǵan ministr Qazaqstannyń 7 oblysynda jeke úi salýǵa daiyn infraqurylym baryn jetkizdi. Iaǵni, daiyn jer telimi kezekte turǵan azamattarǵa taratylmaq.
«Basqa oblystarda jergilikti biýdjettiń múmkindigi bolyp, infraqurylym salynǵanda halyqqa jeke úi salýǵa jer beriletin bolady. Bul másele qarjylyq múmkindikke qarai sheshiledi. Eń bastysy, zań boiynsha jergilikti ákimshilikterge jeke úi salýǵa kez kelgen elimizdiń azamaty ótinish tapsyrýǵa quqyly»,- dedi ol.
Sondai-aq, Qýandyq Bishimbaev «Aýyl» partiiasynyń jetekshisi Áli Bektaevtyń Qazaqstan boiynsha 1,2 mln. adam úi salýǵa jer kezeginde tur degen málimettiń qaidan alynǵanyn bilmeitin bolyp shyqty. «Mundai málimettiń qaidan alynǵanyn bilmeimin. Ony naqtylaý kerek»,- dep jaýap berdi.
