"QAJK ózin Aron Atabektiń ólimine jaýapty sanai ma?" degen Azattyq tilshisiniń suraǵyna sheneýnik "jaýapty sanamaidy" dep jaýap berdi.
– Aron Edigeev 2019 jyldan bastap barlyq meditsinalyq tekserýden bas tartty. Keiingi kezde aryqtai bastaǵany baiqaldy. Jyl basynan beri Ulttyq prevententivti mehanizm, qoǵamdyq baqylaý komissiiasy ókilderin, syrttan dárigerler shaqyrdyq. Olar da dárigerge qaralýdyń mańyzdy ekenin túsindirdi. Týystaryna da aittyq. Dárigerge qaralý, qaralmaý kez-kelgen adamnyń konstitýtsiialyq quqyǵy. Dárigerge qaralýǵa zorǵa kelisti. 22 qyrkúiekte Pavlodar qalasynyń N1 aýrýhanasyna jatqyzylyp, diagnozdary anyqtaldy [Diagnozdary meditsinalyq qupiia sanalady - M.A]. 1 qazanda Pavlodar qalasynyń sot sheshimimen jaza merzimi qysqartylyp, bosatyldy. Sol kúni ápkesi keldi. Meditsina qyzmetkerimen birge Almatydaǵy úiine deiin jetkizildi, – dedi Meiram Aiýbaev.
68 jastaǵy dissident, aqyn Aron Atabek 24 qarashada Almaty qalasyndaǵy aýrýhanada kóz jumǵan. Dissident "Shańyraq oqiǵasy" boiynsha sottalyp, 15 jyl túrmede otyrǵan.
Atabek ózine taǵylǵan aiyppen kelispei, tolyq aqtap shyǵarýdy talap etken. Jaqtastary ony "bilikti ótkir synaǵany úshin" túrmege qamady dep sanaidy. Al bilik saiasi qýdalaý baryn joqqa shyǵady.
Aron Atabek "Shańyraq isi" boiynsha 18 jylǵa sottalyp, túrmede qatań jaǵdaida ustaldy. Túrmede otyrǵan kezde aqynnyń azaptaý týraly aryz-shaǵymyn bilik joqqa shyǵardy. Abaqtyda otyrǵan aqyn aýrýhanaǵa suranǵanymen, bilik "ol emdelýdi qajet etpeidi" dep, ótinishin oryndamady. Saiasi tutqynmen júzdesýge tilek bildirgen eýropalyq quqyq qorǵaýshylar men depýtattarǵa Atabekpen kezdesýge ruqsat bermedi.
Tutqynnyń densaýlyǵy barǵan saiyn nasharlai túskenin keiingi birneshe jylda abaqtyda dissidentpen kezdesken jergilikti quqyq qorǵaýshylar habarlaǵan edi.
Buǵan deiin halyqaralyq quqyq qorǵaý uiymdary men jergilikti belsendiler onyń ólimine bilikti kinálap, túsinikteme berýdi talap etti. Halyqaralyq dárejede tergeý júrgizý qajettigin de alǵa tartty.
