Teńiz deńgeiinen 3010 metr biiktiktegi shyńǵa elýden asa adam shyqty, al bul sharaǵa jalpy 200 den astam adam qatysty. Shyńnyń biiktigine bailanysty qalǵan adamdar shyńǵa jete almasa da, qoldaýlaryn bildirip taýdyń jarym belinen astam jerge deiin kóterildi. Osynshama adamnyń jinalǵany ult kósemine degen halyqtyń zor yqylasy bolsa kerek-ti.
QR onomastikalyq komissiiasyna usynys hatpen birge búgingi kópshiliktiń jasaǵan usynysynyń video nusqasyn da jiberetin boldy. Jinalǵandardyń ortasynda turyp Ahmetbek Nursila:
«Qazaqstan respýblikasynyń anamistikalyq komissiiasyna ótinish jáne usynys: Biyl Álihan babamyzdyń týǵanyna 150 jyl eken. Álihan babamyzdyń qazaq halqyna sińirgen orasan zor eńbegin árbir qazaq biledi, Sondyqtan Alataýdyń osy bir shyńyn (buryn Fýrmanov shyńy dep atalǵan), qazir Álihan Bókeihan shyńy dep ataýǵa «Sapaly qazaq» degen bir top qazaqstandyqtardyń atynan ótinish tastaimyz!
Jáne de, osy taýǵa biikke jete almai qalǵan tómende júzden astam adam bar. Taǵy Qazaqstannyń túkpir-túkpirinen osyǵan «iá» dep jaýap berip qol qoiǵan 5 myńnan astam adamdar bar. Sony biz sizderge hat júzinde aparyp tapsyramyz. Qazaqtyń Alataýy qazaqtyń ulylarynyń attaryn berýge laiyq dep sanaimyz. Solai ma, jigitter?» dep usynys mátinin aityp, bizge suraq tastap sózin aiaqtady.
Sonymen birge, «Álihan Bókeihan shyńynda» otyryp, Ult kósemi Álihan Bókeihanǵa jáne barsha Alash arystaryna arnap quran baǵyshtadyq.
Esterińizde bolsa, buǵan deiin Almaty qalasyndaǵy Fýrmanov kóshesin Álihan Bókeihanǵa aýystyrý týraly usynys jasalǵan bolatyn. Al qazirge resmi bilik jaǵynan eshqandai ún joq. Bul usynys sheshimin tabar dep úmittenemiz. Eger, tipti sheshim tappai jatsa da, biz úshin búginnen bastap bul shyń Álihan Bókeihan shyńy bolyp sanalady. Biz búgin «Álihan Bókeihan shyńyn» aldyq, endigi kezek kóshesin alý. Babamyzdyń toiynda mundai syi jasai almasaq, bizdiń kim bolǵanymyz, biliktiń kim bolǵany? Búgingi urpaq Alash rýhymen rýhtanbai, bolashaqqa sara jol sala almas.
Turdybek Qurmethan
