Oblys kóleminde ınvestısıa boıynsha aýdannyń úlesi 6,5 paıyzdy quraıdy. Bul týraly Túrkistan oblysynyń Óńirlik komýnıkasıalar qyzmetinde ótken brıfıńte Saıram aýdanynyń ákimi Baqtıar Mamaev málimdedi.
Aýdandaǵy kásipkerlik salasy boıynsha belsendi sýbektilerdiń sany 14665 birlikke jetip, ósim 12,8 paıyzdy quraǵan.
«Óńirde 324 shaǵyn jáne orta kásipkerlik sýbektileri tirkelip, onda 992 jumys orny ashylǵan. 2018 jyly kásipkerlik salasynda 85,8 mlrd.teńgeniń ónimin óndirý josparlanyp, 10 aı kóleminde 93,7 mlrd.teńge ónimi óndirilgen. Nátıjesinde jyldyq jospar 109,2 paıyzǵa oryndalǵan. Sondaı-aq, «Bıznestiń jol kartasy 2020» baǵdarlamasy aıasynda 10 aı kóleminde 5 jobaǵa 103 mln.teńgege qoldaý kórsetildi. Kásipkerlikti qarjy ınstıtýttary arqyly qarjylaı qoldaý maqsatynda aýdan kólemindegi mıkrokredıttik uıymdar arqyly 8 myńǵa jýyq adamǵa 4 mlrd. 367 mln.teńge nesıe berilgen», - dedi Baqtıar Saparáliuly.
Turǵyn úı komýnaldyq sharýashylyq salasy boıynsha aýdandaǵy 42 eldi mekenniń 97,6 paıyzy ortalyqtandyrylǵan aýyz sý qubyrymen qamtamasyz etilgen. Tabıǵı gazben aýdandaǵy 42 eldi mekenniń 19 eldi mekeni nemese 45,2 paıyzy qamtylǵan. Damý konsepsıasyna sáıkes 2018-2021 jyldar aralyǵynda 23 eldi meken turǵyndaryn tabıǵı gazben qamtamasyz etip, 100 paıyzǵa jetkizý josparlanyp otyr.
Sondaı-aq, aǵymdaǵy jyly aýdandyq mańyzy bar 8 shaqyrym joldy kúrdeli jóndeýden ótkizý jáne 72,7 shaqyrym 66 ishki joldardy ortasha jóndeýden ótkizý jumystaryna barlyǵy 1735,1 mln.teńge bólingen.
Sonymen qatar, 18,5 shaqyrymdy quraıtyn 20 kóshege ortasha jóndeý júrgizilip, nátıjesinde 81,1 shaqyrym joldyń jaǵdaıy jaqsaryp, aýdandaǵy qanaǵattanarlyq jaǵdaıdaǵy joldar úlesi 8,2 paıyzǵa ósken.
