Abai oblysynyń ákimi Berik Ýáli Semei qalasyndaǵy birneshe sport mekemesin aralap, ózekti máselelerimen tanysty, - dep habarlaidy Dalanews.kz
Qaladaǵy jeńil atletikaǵa arnalǵan oblystyq balalar-jasóspirimder sport mektebi 2023 jyly qurylǵan. Mundaǵy 329 bala 4 aýysymmen 1967 jyly salynǵan ǵimaratta jattyǵady. Nysanǵa turǵyzylǵannan beri kúrdeli jóndeý júrgizilmegen.
Oblys ákimi «Lokomotiv» stadionyn da aralady. Bul aýmaqta kópsalaly sport kesheni men jataqhana salý josparlanǵan. Jobalyq-smetalyq qujattama ázirlenip, saraptamaǵa usynylǵan.
Aimaq basshysy barǵan kelesi nysan - olimpiadalyq rezervtiń oblystyq mamandandyrylǵan balalar-jasóspirimder sport mektebiniń kúres zaly. 1936 jyly salynǵan ǵimaratta balalar grek-rim kúresimen ainalysady. Jalpy sport mektebiniń qaramaǵynda birneshe filial men sport zaldary bar. Barlyǵyn qosa alǵanda 1349 bala 15 sport túrimen shuǵyldanady. Álem jáne Aziia chempionattarynyń júldegerleri bar. Jarystardan 362 medal ielengen. Kúres zalynyń ǵimaraty kúrdeli jóndeýdi qajet etedi. Jobalyq-smetalyq qujattamasy ázirlengen.
Jaqsylyq Úshkempirov atyndaǵy №1 olimpiadalyq rezervtiń mamandandyrylǵan balalar-jasóspirimder sport mektebinde 1328 sportshy 9 sport túrimen shuǵyldanady. Ártúrli deńgeidegi jarystardan 446 medal ielengen. Mekeme qaramaǵynda dene shynyqtyrý-saýyqtyrý kesheni, kúres zaly, jataqhana, «Dostyq» sporttyq lageri bar. Qazirgi tańda sport kesheni janynan oqý ǵimaratyn ashý qajettigi týyndap otyr. Sebebi, tárbielenýshiler ózge mektepterge qatynap oqidy.
Ǵimarat 2011 jyldan beri kúrdeli jóndeý kórmegen. Sport kesheniniń tóbesinen sý ótip, qabyrǵalarynda jaryqshaq paida bola bastaǵan. Nysan ishindegi bassein qalada jylytý maýsymy aiaqtalǵannan keiin jumysyn toqtatady.
Oblys ákimi olimpiadalyq rezervtiń qysqy sport túrlerine arnalǵan mamandandyrylǵan balalar-jasóspirimder sport mektebiniń jumysymen de tanysty. Munda 247 bala shańǵy, biatlon jáne konkimen júgirýmen ainalysady. Ártúrli jarystardan 103 medal ielengen. Onyń ishinde halyqaralyq jarys júldegerleri de bar. Alaida sportshylar zaman talabyna sai kelmeitin alańdarda jattyǵýda. Aimaq basshysyna jańa, halyqaralyq standarttarǵa sáikes keletin shańǵy-rollerlik trassasyn salý týraly usynys aityldy.
Oblys ákimi Semeidegi sport nysandaryn jańǵyrtý, jańadan salý boiynsha tiisti sheshim qabyldanatynyn atap ótti.
«Búgin oblys ortalyǵyndaǵy 10-ǵa jýyq sport nysanynyń jaǵdaiyn kórip, ózekti máselelerimen tanystym. Ókinishke qarai, sportshylarymyz zaman talabyna sai kelmeitin zaldarda jattyǵyp júr. Men aralaǵan sport mekemeleriniń barlyǵy kúrdeli jóndeýdi qajet etedi. Qanshama jyldar boiy nazardan tys qalǵan. Soǵan qaramastan sportshylarymyzdyń jetistikteri kóńil qýantady. Aldaǵy ýaqytta qaladaǵy sport ǵimarattary boiynsha tiisti sheshim qabyldaimyz. Eshqaisysy nazardan tys qalmaidy. Aǵymdaǵy jáne kúrdeli jóndeýdi bastaimyz. Jańa sport ǵimarattaryn salatyn bolamyz», - dedi aimaq basshysy.
