Qańtar–qarasha ailarynyń qorytyndysy boiynsha Astanada LRT jelisin salýǵa respýblikalyq biýdjetten 329,6 mlrd teńge jumsaldy. Bul – biylǵy jylǵa josparlanǵan qarjynyń 99,2 paiyzy, dep habarlaidy Dalanews.kz.
Birinshi kredittik biýro málimetinshe, aeroporttan elordanyń jańa temirjol vokzalyna deiingi jeńil relsti kólik jelisin qarjylandyrý kólemi byltyrǵy kórsetkishterden birneshe ese asyp tústi. 2024 jyly LRT qurylysyna 28,4 mlrd teńge,2023 jyly 52,4 mlrd teńge bólingen.
Barlyq jaǵdaida qarajat Ulttyq qordan maqsatty transfertter esebinen baǵyttalǵan.
Shyǵyn kólemi boiynsha LRT jobasy kólik salasyndaǵy eń iri biýdjet jobalarynyń birine ainaldy. Onyń qurylysyna jumsalǵan qarjy kólik jáne kommýnikatsiialar baǵytyna bólingen respýblikalyq biýdjet shyǵystarynyń shamamen úshten birin qurady.
Salystyrý úshin:
2025 jyly avtomobil joldaryn salý, rekonstrýktsiialaý, jóndeý jáne kútip ustaýǵa 258,5 mlrd teńge, Almatydaǵy relsti kólik infraqurylymyn damytýǵa, onyń ishinde metro qurylysyna 25,6 mlrd teńge bólindi.
Astanadaǵy LRT jobasy 2017 jyly Qytaidyń Damý bankiniń $1,5 mlrd kólemindegi nesielik jelisi esebinen bastalǵan. Alaida 2018 jyly "Astana" banki litsenziiasynan aiyrylǵannan keiin, zaem qarjysynyń bir bóligi sol jerde saqtalǵanyna bailanysty jobany qarjylandyrý toqtatyldy.
2019 jyly sybailas jemqorlyq daýyna bailanysty qurylys taǵy da toqtatyldy. Sol ýaqytqa deiin qurylys-montaj jumystarynyń shamamen 15 paiyzy ǵana oryndalǵan. Sot sheshimimen kelisimshart baǵasynyń negizsiz kóterilgeni jáne 5,8 mlrd teńgeniń urlanǵany anyqtaldy.
Qurylysty qaita jandandyrý 2023 jyly bastaldy jáne bul joly joba biýdjet esebinen qarjylandyryldy. LRT iske qosý merzimi birneshe ret keiinge shegerilgen.
Júieniń synaq rejimindegi jumysy 2025 jylǵy qyrkúiekte bastaldy, al tolyq paidalanysqa berý 2026 jylǵa josparlanyp otyr.
