– 2017-2018 oqý jylynan bastap, sońǵy 5 jyl ishinde alǵash ret joǵary jáne joǵary oqý ornynan keıingi bilimi bar kadrlardy daıarlaýǵa arnalǵan memlekettik bilim berý tapsyrysynyń kólemi ósti. Atap aıtqanda, 2017-2018 oqý jylyna bakalavrıatqa - 37932 grant bólindi, bul ótken jylǵy memlekettik tapsyrys kólemimen salystyrǵanda 6 myńǵa kóp. Magıstratýraǵa - 10004 oryn bólindi, ótken jylǵa qaraǵanda bul kórsetkish 2,5 myńnan astam orynǵa kóbeıgen. Al PhD doktorantýraǵa – 1285 oryn bólindi, bul ótken jylǵy oryn sanynan eki esege kóbirek, – dep jaýap berdi QR Bilim jáne ǵylym mınıstrliginiń baspasóz qyzmeti QazAqparat tilshisiniń saýalyna.
«2017-2018 oqý jylyna arnalǵan mamandyqtar bólinisinde joǵary jáne joǵary oqý ornynan keıingi bilimi bar mamandardy daıarlaýǵa memlekettik bilim berý tapsyrysyn bólý týraly» QR Bilim jáne ǵylym mınıstrliginiń buıryǵy shilde aıynyń ekinshi bóliginde jarıalanady. Mınıstrliktiń habarlaýynsha, memlekettik bilim berý tapsyrysyn bólýde pedagogıkalyq, tehnıkalyq jáne áleýmettik, qyzmet kórsetý salalarynyń mamandyqtaryna basymdyq beriledi.
