Soltústikte qar erte túsip, astyq jinaý toqtady: fermerler dabyl qaǵýda, dep habarlaidy Dalanews.kz Orda.kz-ke silteme jasap.
Qazaqstannyń soltústik óńirlerinde alǵashqy qar fermerler egindi tolyq jinap úlgermei turyp jaýdy. Kóptegen sharýalar qardyń astynda qalǵan egis alqaptaryna alańdap, dizel otynynyń da jaramsyz bolǵanyn aityp shaǵymdandy. Al Aýyl sharýashylyǵy ministrligi jaǵdaidy «turaqty» dep baǵalasa, Zernovoi odaǵy munymen kelispeidi.
Qostanai oblysyna barǵan Orda.kz tilshisi egistikterdiń kei bóliginde pshenitse men burshaq tuqymdas daqyldardyń qar astynda qalǵanyn baiqaǵan. TOO «Manai Agro» sharýashylyǵynyń basshysy Anýarbek Álishev muny «katoktai basqan qar» dep sipattap, keibir fermerlerdiń 50–60 paiyz ónimin jinai almai otyrǵanyn aitty. Degenmen ol «egin – jyl saiynǵy synaq, moiymaý kerek» deidi.
Ministrliktiń málimetinshe, jaǵdai baqylaýda. Vitse-ministr Azat Sultanovtyń aitýynsha, qar az jaýyp, tez erip ketken. Kúnniń jylynýymen tehnika qaita dalaǵa shyǵyp, qalǵan 30 paiyz alqap jinalyp bitedi. Qazir el boiynsha 20 mln tonnadan astam astyq orylǵan, bul ishki qajettilikti de, eksportty da qamtamasyz etýge jetkilikti.
«Olja Agro» holdingi basshysy Alisher Hodjanazarov ta dúrbeleńge sebep joq deidi. Ol egistikterdi aralap shyqqanyn, pisip úlgergen daqyldardyń kópshiligi saqtalǵanyn málimdedi. Degenmen tamyz-qyrkúiektegi uzaq jańbyrlar astyq sapasyn tómendetip, kleikovina deńgeiin azaitqan. Keibir partiialar úshinshi-tórtinshi klass deńgeiinde qalyp otyr.
Zernovoi odaǵynyń ókili Evgenii Karabanov bolsa, kerisinshe, qar men jeldiń saldarynan ónim kólemi men sapasy tómendeitinin aitady. Onyń sózinshe, pisip úlgergen bidaidyń masaqtary úzilip, jerge túsken astyqty jinaý qiyn. Bul protsessti baiaýlatyp, qosymsha shyǵyn ákeledi.
Sonymen qatar, fermerler dizel máselesin de kóterdi. Biyl 403 myń tonna jeńildetilgen janarmai bólingen. Alaida Atyraý munai óńdeý zaýytynan kelgen otyn erte sýyp, parafindenip qalǵan. Sol sebepti Aýyl sharýashylyǵy ministrligi Energetika ministrligimen kelisip, janarmaidy Pavlodar zaýytynyń ónimine aýystyrýdy uiǵardy.
Qorytyndylai kele, qar egin jinaýǵa qiyndyq keltirgenimen, jaǵdaidy «apatty» dep aitýǵa erte. Fermerlerdiń aitýynsha, naýqan qazannyń sońyna deiin jalǵasady, al mamandar basty másele — aýa raiynan emes, agrotehnikalyq baqylaýdyń álsizdiginen týyndap otyrǵanyn aitady.
