Tańǵy aýysym bastalar sátte qurylys alańy oianady. Temirdiń syqyry, motordyń gýili, jerden aspanǵa sozylǵan munaralar. Sol biiktiń birinde Aigúl otyrady. Ol – kran júrgizýshisi. Bul mamandyqty kezdeisoq tańdaǵan joq. Bala kezinen tehnikaǵa qumar bolyp ósti. Úlken mashinalardyń, kúrdeli mehanizmderdiń qalai jumys isteitinin kórgen saiyn júregi tartyp turatyn. Sol qyzyǵýshylyq ony osy jolǵa alyp keldi.
Alǵash ret kran tizginine otyrǵan kúnin Aigúl áli umytqan joq. Qorqynyshtan buryn qýanysh basym boldy.
«Qatty qýandym, súisinip otyrdym. Bul ózim tańdaǵan mamandyq bolǵan soń, boiymda úrei bolmady», – deidi ol.
Qazir onyń ár kúni biikte ótedi. Aigúl úshin jumys kúni aýyr mindet emes, kerisinshe, óz ornyn tapqan jannyń tynysy. «Keremet ótedi» deidi qysqa ǵana. Biraq bul sózdiń artynda jaýapkershilik, tártip, úzdiksiz zeiin jatyr.
Bul salada áiel bolý ońai emes. Aigúl jalǵyzbasty ana retinde qiyndyqty eki ese sezinedi. Er adam da bolý kerek, áiel adam da bolý kerek sátter bolady. Erler basym ortada keide aýyr sóz estisiń, renjitin kúnder de az emes. Biraq ol muny júregine jaqyn almaidy.
«Men olar úshin emes, bala-shaǵam úshin júrmin. Ýaqytym joq bos áńgimege», – deidi ol.
Kran júrgizý – qaýipti jumys. 380 volt toq, biik saty, bir sáttik beiqamdyqtyń ózi orny tolmas saldarǵa ákelýi múmkin.
«Biz qatelik jasamaýǵa tyrysamyz. Kran qatelikti eshqashan keshirmeidi. Sondyqtan ár kóterilgen júkte, ár qozǵalysta saq bolamyz. Janymyzdy shúberekke túiip, Allaǵa shúkirshilik etip otyramyz», – deidi Aigúl.
Osyndai jaýapkershiligi aýyr eńbektiń óteýi retinde Aigúl ai saiyn shamamen 700 myń teńge jalaqy alady.
Ony osy salada ustap turǵan basty kúsh mamandyqqa degen mahabbat. Ózi ósip-óngen, nanyn taýyp otyrǵan joldan basqasyna qyzyqpaidy. Tipti bul salany otbasyna da ákeldi.
«Osy salada birinshi bolyp ózim bastadym. Qazir barlyq baýyrlarym osy jumysta. Ózim tarttym. Shúkir Allaǵa», – deidi ol maqtanyshpen.
Aigúl úshin áieldiń bul kásiptegi «artyqshylyǵy» joq. Óitkeni jumys bireý, talap ortaq. Biraq onyń eń úlken jetistigi eńbeginiń arqasynda úi alyp, kólik minýi, balalaryn oqytyp otyrǵany.
«Sol jetistik men úshin eń úlken baq. Allaǵa shúkir», – deidi batyr ana.
Qyz balalarǵa bul mamandyqty usynýǵa asyqpaidy.
«Qyz bala názik bolyp júrgeni jaqsy. Bul jumys aýyr», – dep qyzdarǵa ápkelik keńesin de berip ótti.
Aigúldiń bolashaqtaǵy armany qarapaiym ári biik.
«Balalarymdy jetistikke jetkizý», – dep atap ótti óz armanyn batyl áiel.
Biikte otyrǵan ár kúni tek júk kóterip qana qoimaidy. Ol óz taǵdyryn, balalarynyń bolashaǵyn da biikke shyǵaryp keledi. Aigúldiń ómiri bir nárseni dáleldeidi: kran tizgindegen áiel álsiz emes, kerisinshe batyl, sabyrly jáne eń bastysy, óz jolyn tańdaǵan adam.
