Shymbulaqtaǵy as máziriniń baǵasy kóptiń narazylyǵyn týdyrdy, dep habarlaidy Dalanews.kz.
Egovpress telegram arnasy jariialaǵan beinejazbada demalýǵa barǵan arýdyń biri bir staqan shaidyń baǵasy aitarlyqtai qymbat ekenin aityp, óz shaǵymyn jetkizdi.
“Shymbulaqta bir qyzyq tendentsiia bar. Neǵurlym joǵary kóterilseń, soǵurlym tamaq qymbattai beredi. Biz qatty tońyp qaldyq, sondyqtan shai isheiik dedik. Ádette shai ishpeimin, biraq mynadai kishkentai staqan shaiǵa 5 myń teńge tóledim”, – deidi ol.
Beinejazba kópshiliktiń qyzý talqysyna tústi. Kóp qoldanýshy taý-shańǵy keshenindegi baǵanyń tym joǵary ekenin aityp, áleýmettik jelilerde pikir qaldyrdy.
Al Egovpress arnasy bul jaǵdaiǵa bailanysty bylai dep málimdedi.
“Halyqqa arnalǵan Shymbulaq kýrortynyń ieleri — oligarhtar Serjan Jumash pen Vladimir Sarybekov shaǵyn staqan shaidyń nege 5000 teńge turatynyn kópshilikke túsindirer dep úmittenemiz”, – delingen derekkóz taratqan habarlamada.
