Túrkistandyq boksshy Sáken Bıbosynov Serbıada ótken halyqaralyq Belgrade Winner týrnıriniń jeńimpazy atandy. Ol Olımpıada lısenzıasynyń ıegeri 52 kelige deıingi salmaqta fınalda qyrǵyzstandyq Azat Úsenalıevti jeńdi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.   

Álemniń túkpir-túkpirinen kelgen azýly bylǵary qolǵap sheberleri arasynda ótken jekpe-jekte Qazaqstannyń namysyn qorǵaǵan túrkistandyq Saken Bıbosınov jeńistiń shyńyn baǵyndyryp, týrnırdiń jeńimpazy atandy.

Jerlesimiz rıngte barlyq qarsylastaryn tize búktirip, altyn medal ıelendi. Halyqaralyq týrnır – Tokıo Olımpıadasy qarsańynda tartysty ótken týrnırlerdiń biri. Álem boıynsha eń judyryqty boksshylardyń tórtjyldyqtyń basty dodasyna sanaýly kúnder qalǵanda taǵy da bir ózderiniń sheberlikterin kórsetken doda boldy.

Belgrad qalasynda aıaqtalǵan halyqaralyq týrnırde +91 kg salmaqta sharshy alańǵa shyǵatyn, asa aýyr salmaqtaǵy Túrkistan oblysynyń boksshysy Nurlan Saparbaı qola júldeger atandy. Bul boks básekesinde erler 8 salmaq boıynsha, al áıelder 10 salmaq boıynsha judyryqtasty.