– 18 jasymda 30-ǵa kelgen Semeidiń azamatyna turmysqa shyqtym. Onyń úii joq, men jataqhanada turamyn. Qaida baramyz? Otbasyly adamdardy jataqhanaǵa turǵyzbaidy. Sonymen bir jeke úige kirdik. Qar túskennen keiin onda turýǵa múmkinshilik bolǵan joq. Kúieýim Ahmet Qýanulyna baryp: «Biz munda tura almaimyz, men áielimdi alyp ketemin» degende ol kisi: «Joq, alyp kete almaisyz. Biz qazir aýyl aralap, osyndai talanttardy izdep jatyrmyz. Kelip otyrǵan adamdy jibere almaimyz. Oqytamyz, jaǵdai jasaimyz, sizge jumys tabamyz» dedi. Sóitip kúieýim teatr institýtyna zavých bolyp jumysqa kirdi, – dep eske alady Tólegenova.
Budan keiin ánshi otbasymen birge jataqhanada, ýchilisheniń jertólesinde turǵanyn aitady. «Turmystyq ómirde kórgen qiynshylyqty Qudai basqa bermesin» dep baiandady ol. Aitýynsha, qiynshylyqqa shydamaǵan kúieýi aqyrynda araqqa salynyp ketken.
– Ol kisi oqymysty, bilimdi boldy. Al men aýyldan kelgen ne bilemin? Kitap ta oqymaǵanmyn. Sóitip júrip kúieýim maskúnem bolyp ketti. Men oǵan eshteńe aita almaimyn, qorqamyn, aitýǵa uialamyn. Ishken adamnyń jaiy belgili ǵoi. Men teatrǵa jumysqa turǵan soń, ol artymnan izdep kelip, talai shý shyǵaryp, berekemdi qashyrdy. Sonymen bul adam bolmaidy dep eki balamdy alyp, qashtym da kettim, – dep eske alady Bibigúl Ahmetqyzy.
Arada 5-6 jyl ótken soń Tólegenova uzyn boily, kelbeti kelisken Kámel esimdi jigitke turmysqa shyqqan.
– Ákimshi jigit edi. Qyzdardyń barlyǵy da minezi jaqsy, araq ishpeidi dep maqtaityn. Sóitip, ári beri qarap júrdim de, eńbekqor jigit ekenin bildim. Boi dese boiy, túr dese túri bar. Ekeýmizdiń áńgimemiz jarasyp, 1961 jyly turmysqa shyqtym. Ákesi kezinde Leninmen kezdesken, sondai bilimdi kisi eken. Men ol kezde Qazaqstannyń halyq ártisimin. Olar maǵan ártis bolǵannan soń birtúrli qaraǵan bolýy kerek, – deidi Tólegenova.
Aitýynsha, ekinshi kúieýi ákesimen jasty azamattan qyzǵanyp, aqyrynda oǵan qol kótergen.
– 1967 jyly is-saparmen Mysyrǵa bardym. Kelgennen keiin Muhamedjan Qarataev degen ákemmen jasty aǵamnan qyzǵanyp, maǵan qol kóterdi. Miym shaiqalyp, aýrýhanaǵa tústim. Teatrdaǵylar «Tólegenovanyń kúieýi basyn baltamen jarypty» dep shýlasty. Men ondaidy jek kóremin, eshqashan qol tigizbeitin adammyn. «Sen sol kisimen eki adam bolyp ádeii kettiń» dep jala japty. Bireýler aidap salǵan bolýy kerek. Óitkeni ondaiy bolmaityn. Qaita bireýler maǵan qarasa, kúlip otyratyn. Jalǵyz ózimdi ǵana emes, qyzym meni jaqtap edi, ony da uryp tastady. Sóitip ekeýmiz aýrýhanadan bir-aq shyqtyq. Meniń miym shaiqalǵan. Bálesinen aýlaq, balalaryma zaqym kelgenshe, turmaimyn dep ketip qaldym, – deidi ol.
Bibigúl Ahmetqyzy jasy 40-qa jaqyndaǵanda jas jigitke turmysqa shyqqan. Alaida ol da jubaiynyń úide otyrǵanyn qalap, ánshige kún kórsetpegen kórinedi. «Qazaqtyń jigitteri áielderin otyrǵyzyp qoiyp, ústinen qarap otyrǵandy jaqsy kóredi» deidi Bibigúl Ahmetqyzy.
https://dalanews.kz/15747
