Maqat aýdany ákimi bolǵan Rınat Ibragımov 2 jyl 3 aıdan keıin óz aryzyna sáıkes jumystan bosatyldy, - dep habarlaıdy Dalanews.kz.

Jergilikti basylym málimetinshe, eks-ákimniń jumystan ketýi burynǵy otbasylyq jaǵdaıyna baılanysty ma, belgisiz. Rınat Ibrgaımovtyń burynǵy jubaıy Aqmaral Úmbetqalıeva áleýmettik jelde vıdeoúndeý jarıalap, burynǵy kúıeýinen kórgen zábirin jipke tizip, balalaryn ózinen zańsyz túrde tartyp alǵanyn, bir jyl boıy kórsetpeı qoıǵanyn aıtyp, kómek suraǵan edi. 

Bul vıdeomálimdeme kópshilik arasynda túrli rezonans týǵyzdy. Eks-jubaıynyń vıdeojazbasynan keıin Rınat Ibragımov te áleýmettik jelidegi paraqshasyna vıdeomálimdeme taratyp, burynǵy jubaıynyń sózin teriske shyǵara otyryp, BAQ ókilderin asyǵys qorytyndy jasamaýǵa shaqyrdy.

Artynsha oblystyq ákimdiktiń baspasóz qyzmeti mán-jaıdy anyqtaý úshin qyzmettik tergeý júrip jatqanyn málimdedi.

24 mamyrda Maqat aýdanynyń ákimi óz erkimen jumystan ketti.

Qazirgi kezde onyń mindetin aýdan ákiminiń orynbasary Bekádil Jaıkın atqaryp jatyr.