Pavlodar oblysynyń burynǵy ákimi Bolat Baqaýov Pavlodar qalasynda “Anaǵa taǵzym” eskertkishin ornatýdy taǵy da usyndy, dep habarlaidy Dalanews.kz.
Ol áleýmettik jelidegi jazbasynda buǵan deiin aitqan usynys qaitadan ortaǵa saldy.
“Qazaqta “anańdy úsh ret Mekkege arqalap aparsań da, paryzyńnan qutylmaisyń” degen danalyq sózi bar. Bunyń astarynda tereń maǵyna jatyr. Ana sábiin dúniege ákelip, tún uiqysyn tórt bólip ósirip, oǵan tárbie, bilim berip, uiadan ushqansha búkil mahabbatyn syilaidy.
Analarymyz ashtyq, soǵys, toqyraý jyldarynda kóp qiyndyq kórdi. Basqa kún týǵanda erlerine qoldaý bolyp, tyńbai eńbektenip, bala-shaǵasyń asyrady. Analarymyzdyń arqasynda qazir er jetip, bilim alyp, adam boldyq. Endi biz analarymyzǵa taǵzym etip, olardyń aq sútin aqtaý - paryzymyz”, - dep jazdy eks-ákim.
Aitýynsha, bul jospar kópten beri oiynda bolǵan. Tipti aimaqtyń ziialy qaýymdary da qoldaý kórsetken kórinedi.
“Osydan birneshe jyl buryn Pavlodar qalasynyń ortalyǵynda barsha analarǵa arnap “Anaǵa taǵzym” atty eskertkish ornatý josparymda bar bolatyn. Aimaqtyń búkil ziialy qaýymy osy oiymdy quptap, qoldaý kórsetken edi. Eskertkishtiń jobasyn músinshi Asqar Nartov daiyndap úlgerdi. Bul jaqsy isti taǵy bir márte kótergendi jón dep sanadym. Qalanyń ádemi saiabaǵynda demeýshilik qarajatqa analarymyzǵa arnap eskertkish ornatý qajet. Birinshiden bul arqyly anaǵa qurmet, iltipat bildiremiz, ekinshiden óskeleń urpaqqa durys tálim-tárbie beremiz. Eskertkish anany qurmetteý, syilaý úlgisi bolsyn degen oiym bar”, - dedi Bolat Baqaýov.
Esterińizge sala keteiik, 2020 jyldyń mamyr aiynda Pavlodar oblysynyń eks-ákimi Bolat Baqaýov aýyr zardaptarǵa ákep soqqan laýazymdyq ókilettigin asyra paidalanǵany úshin 3,5 jylǵa bas bostandyǵyn shekteý jazasyna kesilgen bolatyn. Burynǵy sheneýnik tergeýmen mámilege kelgen.
