Búgin «Býrabaı» ulttyq parkinde Qazaqstandaǵy eń joǵary tehnologıalyq ınteraktıvti murajaılardyń biri, Abylaı han alańynda ornalasqan mýltımedıalyq ınteraktıvti keshenniń saltanatty ashylýy ótti.
Keshen mádenı-kórmede úılesimdi oryn taýyp, Qazaqstannyń mádenı, rýhanı jáne tarıhı murasyn damytýǵa yqpal etedi.
Saltanatty is-sharaǵa QR Mádenıet jáne aqparat mınıstri Aıda Balaeva, Aqmola oblysynyń ákimi Marat Ahmetjanov, QR Prezıdenti İs basqarýshysynyń orynbasary Rýstam Baıalıev jáne t.b. qatysty. 
«Býrabaıdyń tumsa tabıǵatyn, tarıhı-mádenı baılyǵyn kópshilikke tanytý – óte ózekti. Búgingi zamanaýı ınovasıalyq keshenniń ashylýy óskeleń urpaqty otansúıgishtikke tárbıeleýde mańyzdy qadamdardyń biri dep esepteımin. Munda jastar óńirdi ǵylymı-shyǵarmashylyq turǵydan tereń zerdelep, rýhanı kemeldenip, mol taǵylym alady dep senemin», – dedi Aıda Balaeva. Sonymen qatar mundaı keshender tek tarıhı turǵydan ǵana emes, qoǵamdyq sanany jańǵyrtýǵa yqpal etetin ozyq ınstıtýt qurýda mańyzdy ekenin atap ótti.
Keshen 2021 jyly iske qosyldy, 3 jyldan keıin onyń tujyrymdamasy qaıta qaralyp, sońǵy anımasıalyq jáne aýdıovızýaldy tehnologıalardy qoldana otyryp jańartyldy. 
«Mýltımedıalyq ınteraktıvti keshen — jaı ǵana mýzeı emes, bul jerde ınovasıa men dástúr ortaq úılesim tapqan. Keshenniń Abylaı han alańynda ornalasqany – erekshe oqıǵa. Bul jer elimizdiń kıeli oryndarynyń tizimine kiredi jáne Býrabaı kýrortynyń eń basty kóz tartar orny. Mýltımedıalyq ortalyq demalys pen oıyn-saýyq orny ǵana emes, sonymen qatar mádenı pikir almasý ortalyǵy bolatynyna senemin»,– dedi Aqmola oblysynyń ákimi Marat Ahmetjanov.
Keshen Uly Dala murasy, Qazaqstanǵa saıahat, Samuryq qusynyń ushýy, Batyrlar dalasy, Máńgilik El, Uly Dala tarıhy, Qazaqtyń tarıhı tulǵalary, Ýaqyt dálizi, Abylaı han batasy dep atalatyn toǵyz taqyryptyq aımaqqa bólingen. Bul árbir kelýshige qazaq mádenıetin sezinýge jáne el tarıhymen tanysýǵa múmkindik beredi.
Aıta keteıik, jyl saıyn Qazaqstandaǵy vızıt-ortalyqtarǵa myńdaǵan adam keledi. İle-Alataý ulttyq saıabaǵyndaǵy Túrgensaı jáne Sharyn shatqaly sıaqty eń tanymal jerlerdi jylyna 300 000 adam kóredi. Bul sandar atalǵan mekenderdiń eresheligin ǵana emes, eldiń baı mádenı murasyn saqtaýǵa jáne nasıhattaýǵa yqpal etetin ınfraqurylymdy damytýǵa, qoldaýǵa baǵyttalǵan jumystardyń nátıjesin kórsetedi.
QR Mádenıet jáne aqparat mınıstrliginiń baspasóz qyzmeti
