Bunyń aldynda inspektsiia Twitter, TikTok jáne "VKontakte" jelileriniń jumysyna shekteý engizgen. Elde Skype messendjeri de jumys istemei tur.
Ol kezde messendjerler jumysy azamattardyń "jeke málimetterin suryptaý jónindegi zań erejelerin buzǵany" úshin shekteldi delingen. Biraq memlekettik inspektsiia taratqan málimette WeChat týraly eshteńe aitylmaǵan.
Mekeme taratqan málimette shekteýler "anyqtalǵan kemshilikter durystalǵan soń" alynatyny habarlandy.
Eske salaiyq, jaqynda Ózbekstan prezidenti Shavkat Mirziiaev TikTok qoldanýshylardy qolbasshy Ámir Temir men aqyn Álisher Naýaidiń tarihi eskertkishterin qorlady dep synaǵan.
Samarqand oblysynda turatyn Inomjon Pardaev esimdi tiktoker qaladaǵy Ortalyq saiabaqta ornalasqan Álisher Naýai eskertkishiniń tusynda rolik túsirip, áigili ózbek aqynyna til tigizgen edi. Ony naqurysqa teńep, aqynnyń atyn buzyp aityp, shyǵarmashylyǵyn kelemejdegen.
Bul video lezde álemjelige tarap blogerdiń áreketi halyqtyń ashýyn týǵyzǵan edi. Keiin osy rolikti túsirgen eki tiktoker ustalyp, 15 kúnge qamaýǵa alyndy. “Kúlli Ózbekstandy uiatqa qaldyrdyq. Osy áreketimiz úshin qatty ókinemiz, halyqtan keshirim suraimyz”, – desti blogerler.
Bul jait ózbek basshysyn da bei-qai qaldyrmady. “Jastar forýmynda” atalǵan jaitqa arnaiy toqtalǵan Mirziiaev tiktokerlerdi tártipke salý týraly tapsyrma bergen.
“Bular (tiktokerler, red.) betimen ketip barady! Haip qýǵan qaýymǵa “ái, der áje, qoi, der qoja” tabylmai tur. Aldymen Ámir Temirdiń eskertkishin qorlaǵan edi. Keiin Ekinshi dúniejúzilik soǵysta qaza tapqan 400 myńǵa jýyq ózbek jaýyngerine qurmet etip qoiylǵan “Azaly ana” eskertkishiniń tóbesine shyǵyp ketti.
Ultymyzdyń áigili tulǵasy Álisher Naýaidi kemsitip, aýzyna kelgendi kókidi. Keibir kórgensiz jastardyń tártibin tezge salý qajet. Bulardyń ata-anasy, ata-ájesi, mekteptegi muǵalimi qaida qaraǵan, balaǵa qandai tálim berýde?”, – dep qapalanǵan edi Mirziiaev.
Budan bylai qoǵami qundylyqtarǵa qaishy áreketke barǵan tiktokerler qatań jazalanatyn bolady. Osyndai pármen bergen ózbek prezidenti “qazirden qamdanbasaq, erteń kesh bolady” dep otyr.
“Jastar forýmynda” sóz sóilegen Mirziiaev jas otbasylardyń arasynda ajyrasýdyń jiilep ketkenin, destrýktivti aǵymdardyń jetegine erip, dástúrli dinnen teris ainalǵan jastardyń kóbeiip jatqanyna alańdaitynyn aitqan.
“Sońǵy 5 aida 7 myńǵa jýyq jas qylmysqa barǵan. 40 myńnan asa jasóspirim men bozbalalar politsiianyń esebinde tur. Bul jastarmen múlde jumys júrgizbeitinimizdiń belgisi” degen edi ol.
Shildeniń basynda Namangan oblysynyń basshysy Shavkatjon Abdýrazakov jastardyń kóbirek kitap pen gazet oqýy úshin áleýmettik jelilerdi bir aiǵa óshirýdi usynǵan. Oǵan jaýap bergen depýtat Rasýl Kýsherbaev "aqparat zamanynda áleýmettik jelilerdi shekteý aqylǵa qonymsyz sheshim" dep málimdegen.
https://www.youtube.com/watch?v=wWkXbRpDa7k
