Túneýkúni telejýrnalist Maiia Bekbaeva ózge ult ókilderi tólqujatyna qazaq dep jazsyn degen usynys aityp, aidy aspanǵa shyǵarǵan edi dep habarlaidy Dalanews.kz.
Nazarbaevtyń Assambleiadaǵy orynbasary qyzmetine kelgen Bekbaevanyń aitýynsha Qazaqstanda turatyn talai ult ózin qazaq sezinedi eken.
"Endeshe bularǵa nege mundai múmkindik bermeske? Amerikany alaiyqshy. Úlken el, ártúrli ulttar turady. Biraq bári ultyn jazatyn jerge “amerikalyq” dep kórsetedi", – degen edi Maiia hanym.
Bekbaevanyń usynysyna Ulttyq keńes múshesi, jýrnalist, memlekettik tilge jetik Maksim Rojin jaýap qatypty. Rojin bul usynystan bálendei ózgeris bolmaidy deidi. Aty qazaq bolǵandar, zaty qazaqqa ainalmaidy.
Eldiń bári bir túnde qazaqsha sairap ketpeidi. Rojin bul usynystyń orynsyz ekenin meńzep ótipti.
"Qandai usynys bolsyn onyń oryndy ne orynsyz ekenin kórsetetin bir ǵana sipattama bar. Ol usynystan ne ózgeredi? Qarapaiym tilmen aitqanda ol usynystan halyqqa, elge, azamatqa, ózińe ne paida?.
Sońǵy kúnderi meni tegtep kóp azamat tólqujatymda ultty ózgertsem, qarsy emes ekenin, tipti "sen ózgertseń ruqsat" dep jazyp jatyr. Oǵan qarsy oilar da aitylyp júr, oryndy dep oilaimyn.
Osy sátte barlyǵymyz bir suraqqa jaýap izdeiikshi: ultty tólqujatta ózgertsek, ne ózgeredi? Naqty tizip berseńizder. Elde, halyqta,qazaq dalasyn mekendegen árbir azamatta ne ózgeris bolady?", – dedi saýaldy tótesinen qoiǵan eken Ulttyq keńes múshesi.
"Menińshe ózgeris bolmaidy.
Qazaq tilin bilmeitinder qazaqsha sóilep ketpeidi, jemqorlar joiylyp ketpeidi, ekonomika qarqyndy damyp ketpeidi, teńge baǵamy dollarmen teń bolyp ketpeidi. Solai ma?
Al olai bolsa, popýlizmdi ysyryp tastap, elge paidaly usynys jasaiyq", – deidi Rojin.
Onyń pikirinshe orys bolyp-aq kindik kesken jerin qurmetteýge bolady. Al ulttyq erekshelik pen patriotizmdi shatastyrýǵa bolmaidy.
"Kóbimiz Jaratýshynyń bergen ultymen, patriotizmdi shatastyrǵan sekildimiz. Moinymyzǵa Jaratýshynyń isin emes, adamnyń qolynan keletin, elge paidaly dúniemen ainalysaiyq", – deidi Rojin.
