BQO-da taǵy da ushqyshsyz ushý apparatynyń synyqtaryna uqsas zattar tabyldy, - dep habarlaidy Dalanews.kz.
Batys Qazaqstan oblysynyń Jánibek aýdanynda dron bólshekterine uqsas zattar anyqtaldy. Bul aqparatty oblystyq Politsiia departamenti rastady.
"BQO Politsiia departamenti ýákiletti organdarmen birlesip, Jánibek aýdanynda tabylǵan ushqyshsyz ushý apparatynyń bólshekterine qatysty tekserý júrgizip jatyr. Nysan eldi mekenderden qashyq jerden tabylǵan. Qazir oqiǵanyń barlyq mán-jaiy anyqtalyp jatyr," – dep jazylǵan resmi málimdemede.
Bul – óńir aýmaǵyndaǵy osyndai besinshi oqiǵa. 18 naýryzda Tasqala aýdanyna uzyndyǵy úsh metrlik apparat qulaǵan bolatyn. 18 aqpanda Bókei ordasy aýdanynyń Uialy kentinde osyndai jaǵdai bolǵan edi. Al sońǵy derek 24 naýryzda tirkeldi.
Aita keteiik, áskeri sarapshy, tanymal jýrnalist Amangeldi Qurmetuly buǵan deiin osy týrasynda óz boljamyn aitty.
«Batys Qazaqstan oblysy jerine belgisiz apparat qulapty. Reseilik jáne otandyq birqatar media frantsýzdyń SAGEM kompaniiasy jasaǵan Crecerelle barlaý drony bolýy múmkin ekenin jazdy. Biraq Crecerelle ekinshi sýrette tur. Birinshi sýrettegi basqa dron. Frantsýz emes, reseilik «Orlan 10» ǵa uqsaidy negizi. Ashyq derek kózderinen Crecerelle-diń birinshi sýrettegige uqsas modifikatsiiasyn tappadym. Al «Orlan 10» oǵan birshama uqsaidy. Demek ótkende Resei jerindegi Qazaqstan munaiyna arnalǵan «Kropotkinskaia» munai aidaý stansasyna jasalǵan dron shabýylyna da sál kúmánmen qaraý kerek siiaqty», - dedi ol buǵan deiin.
