Bozymbaev kezegin kútýde
Qazir olardyń birazy saiasi salmaǵynan airylyp, saiasattyń sahnasynan qarasyn batyrdy.
Endi beri sáýleli sátin kútip, aldaǵy ýaqytta saiasattyń qara qazanyn burq-sarq qainatý úshin eki qolyn ysqylap, eldegi saiasi naýqandardyń tolyq aiaqtalýyn kútip otyr.
Solardyń biri hám biregeii – Qanat Bozymbaev.
Iá, Nazarbaevtyń kezinde Bozymbaev saiasi máselelerge kóp aralasqan joq.
Biraq kvazisektorda iri qurylymdardy basqaryp, ekonomikalyq máselelerdiń túiinin tarqatýda Bozymbaevtyń ózindik orny boldy. Ony eshkim joqqa shyǵarmas.
Bozymbaev tek sońǵy jyldary ǵana Pavlodar, Jambyl jáne Almaty oblysynyń ákimi bolyp, saiasattyń qara sorpasyn sapyra bastaǵanda Qańtar oqiǵasy oryn alyp, tasaǵa ketýge májbúr boldy.
Aitpaqshy...
Bozymbaev «Kegokty» basqaryp turǵanda elimizdiń Soltústigindegi elektr qýatyn Soltústikke jetkizip, úlken is tyndyrǵanyn bireý bilse, bireý bilmeýi múmkin.
«Kegokty» o basta Muhtar Ábliazov quryp, jumysyn jolǵa qoiǵan-dy.
Biraq Ábliazov Nazarbaevpen sózge kelgennen keiin «Kegoktyń» kósegesin kógertý isi Bozymbaevqa buiyrdy.
Nazarbaev rejimi kezinde Ábiliazovtyń sońynda qalǵan dúnieni saqtap qalyp, jetekshi kompaniiaǵa ainaldyrý ekiniń biriniń qolynan kelmeitin sharýa-tuǵyn.
Aitalyq, bilikti menedjer Muhtar Jákishev kezinde «QazAtomóndiris» kompaniiasyn ǵalamdyq deńgeidegi kompaniiaǵa ainaldyryp artynsha Nazarbaevqa jaqpai, abaqtyǵa qamalǵanyn bárimiz bilemiz.
Jákishev ketse de, «QazAtomóndiris» onyń arqasynda halyq arasynda bedelin joǵaltpady. Kerek deseńiz, áli kúnge deiin Jákishev deseńiz «Qazatomóndiris», «Qazatomóndiris» deseńiz Jákishevtyń esimi oiǵa orala ketedi. Sondyqtan Jańa Qazaqstanǵa Jákishev pen Bozymbaev óte kerek kadrlar.
Al «Kegok» úshin Ábiliazov Jákishevtei qamqor áke bola alǵan joq. Esesine mundai mańyzdy missiia, iaǵni, elimizdiń elektr jelilerin damytý isi Bozymbaevqa buiyrdy.
Bilikti energetik
Ol bul salada taban aýdarmastan 6-7 jyl jumys istedi. Bozymbaevtyń «Qazaqstannyń elektr jelilerin basqarý kompaniiasyn» basqarǵan jyldary aýyz toltyryp aitatynda jumystar atqardy.
Aitalyq, Qazaqstannyń Ulttyq elektr jelilerin jańartý isi, 2004-2009 jyldary 500 kV elektr qýatyn tasymaldaityn «Soltústik-Ońtústik» elektr jelisi tartylǵanyn airyqsha atap aitýǵa bolady. Osy jobanyń arqasynda elimizdiń Ońtústik oblystary elektr tapshylyǵynan qutyldy. Budan basqa Moinaq GES-i salyndy.
Keń baitaq Qazaqstannyń bir sheti men ekinshi shetine elektr qýaty erkin jetýi úshin Bozymbaev baryn salyp jumys istedi. Osylaisha ol «Kegokty» elimizdegi eń iri kompaniialardyń qataryna qosty.
«Kegoktan» keiin Bozymbaev «Samuryq-Qazyna» qorynda da at shaldyryp, basshylyq qyzmetterdi atqarǵanyn bilemiz.
Jalpy joǵary biliktiń eshalonynda Bozymbaev ózin energetika salasy boiynsha bilikti maman retinde kórsetken kadr. Sol sebepti ol QR Energetika ministrlgin basqaryp, biraz jumys istegenin de bilemiz.
Osy aralyqta Bozymbaevtyń basshylyǵymen Qyzylordadan beri «Saryarqa» gaz qubyry tartyldy. Osy jobanyń arqasynda qazir Astananyń JES-teri birtindep gazǵa kóshe bastady.
Astana turǵyndarynyń kómir tútininen arylýyna Bozymbaev ta óz úlesinen qosqanyn aitýǵa tiispiz.
Ol Jambyl men Pavlodar oblysyna ákim bop taǵaiyndalǵanda óńirdegi energetika salasynda qalyptasqan máselelerdiń túiinin tarqatý úshin jiberilgenin baiqaimyz.
Máselen, Pavlodar oblysyndaǵy iri energetikalyq nysandardy baýyryna basqan oligarhtarmen memleket múddesin qorǵaý úshin bilikke Bozymbaevtyń is-tájiribesi kerek bolǵany anyq. Osylaisha ol bilikti energetik maman deńgeiinen kóterilip, mańyzdy saiasi figýraǵa ainalyp kele jatqanda Qańtar oqiǵasy oryn alyp, kóleńkege ketýge májbúr boldy.
Qańtardaǵy synaq
Qańtar oqiǵasynyń aldynda Nazarbaevtyń úrim-butaǵy jaýlap alǵan Almaty oblysyn basqarýdy Toqaev Bozymbaevqa senip tapsyrǵany anyq.
Qandy qańtarǵa qaita oralsaq.
Dál sol kezeńde eski júieniń jantalasa kúresýi eki jerde qatty júrgenin baiqaimyz. Eń basty kúres Astanadaǵy Aqordada júrse, ekinshi jantalastyń oshaǵyna Almaty men Almaty oblysy ainaldy.
Aqordadaǵy kúreste Toqaev tabandylyq tanytyp, memlekettiń irgesin shaiqaltpai ustap qaldy. Al Almaty qalasynda Saǵyntaev pozitsiiany berip qoisa, Almaty oblysynda Bozymbaev Nazarbaev jandaishaptaryna qarsy tura bildi.
Ol halyqtyń ortasyna shyǵyp, ashýǵa berilip áigili «bylapyt» sózin aitqany da esimizde. Osylaisha ol syn saǵatta halyqtyń ortasynda boldy. Bozymbaevtyń bul áreketi aldaǵy ýaqytta Aqorda tarapynan sózsiz baǵalanýy kerek.
Sondyqtan Jańa Qazaqstannyń saiasat sahnasynan Bozymbaev syrt qaldy dep suq saýsaqty búgýge áli erte. Aldaǵy ýaqytta ol Úkimetti basqarýǵa laiyqty kandidattardyń birine ainalýy múmkin. Bolmasa elimizdegi eń iri Ulttyq kompaniialardyń birin basqarý isi Bozymbaevqa senim tapsyrylýy múmkin.
Bul rette Bozymbaevtyń jalaiyrlyǵy óz aldyna bólek áńgime... Ol birinshi kezekte tehnokrat maman. Al Toqaev biligi tehnarlarǵa sýsap otyrǵanyn bárimiz bilemiz.
Nurlan JUMAHAN
