Memleket basshysy jasandy intellektini damytý máseleleri jóninde keńes ótkizdi, - dep habarlaidy Dalanews.kz.
Prezident Qasym-Jomart Toqaevtyń tóraǵalyǵymen jasandy intellektini damytý máseleleri jóninde keńes ótti. Keńeske premer-ministr Oljas Bektenov, Prezident ákimshiliginiń basshysy Aibek Dádebai, Úkimet músheleri, ortalyq memlekettik organdardyń jetekshileri qatysty.
Prezident qazir dúnie júzinde jasandy intellekti qarqyndy damýyna bailanysty sipaty múlde jańa tehnologiialyq ózgerister bolyp jatqanyn atap ótti.
"Bul tehnologiia álemdegi barlyq eldiń damýyna tikelei áser etip otyr. Qazir onsyz jahandyq básekege tótep berý múmkin emes. Ozyq tehnologiialar ult derbestiginiń kepiline, ekonomikalyq ósimniń qozǵaýshy kúshine ainalyp jatyr. Biz jasandy intellekt salasynda birqatar jetistikke qol jetkizdik, biraq bosańsýǵa bolmaidy.
Osy strategiialyq baǵytta tabandy jumys isteýimiz kerek. Bul jumysqa men eń mańyzdy basymdyqtyń biri retinde qaraimyn. Birikken Ulttar Uiymynyń Saýda jáne damý jónindegi konferentsiiasynyń (UNCTAD) boljamy boiynsha 2033 jylǵa qarai jasandy intellekt naryǵynyń aýqymy 4,8 trillion dollarǵa jetýi múmkin. Al onyń ǵalamdyq tehnologiialyq indýstriiadaǵy úlesi 7 paiyzdan 29 paiyzǵa deiin artady. Bul, árine, teńdesi joq ósim bolmaq. Jasandy intellekt damýdyń jańa múmkindikterine keńinen jol ashady", – dedi Memleket basshysy.
Prezidenttiń aitýynsha, qazir bul saladaǵy báseke kúsheidi.
"Biyl shilde aiynda AQSh prezidenti Donald Tramptyń ákimshiligi America’s AI Action Plan strategiiasyn jariialady. Onda jasandy intellekt AQSh-tyń tehnologiia, ekonomika jáne qorǵanys salalarynda kóshbasshy el bolyp turýyna qajet asa mańyzdy qural retinde qaralǵan. Mamandarymyz osy jáne basqa da qujattardy muqiiat zerdelep, naqty qorytyndy jasaýy kerek. Al Qytai jasandy intellekt salasyndaǵy yntymaqtastyqty damytý jónindegi jahandyq uiym qurý týraly bastama kóterdi. Maqsat – jasandy intellektini basqarýǵa arnalǵan kópjaqty tásilderdi ilgeriletý, sondai-aq, tsifrlyq alshaqtyqty joiý, jasandy intellektini turaqty qoldaný jáne ony paidalaný etikasyn qalyptastyrý. Qytaidyń mundai uiym qurý týraly usynysyn qoldaý kerek dep oilaimyn. Daiyndyq is-sharalaryna atsalysý qajet. Bul – elimizdiń múddesi. Qazaqstannyń negizgi maqsaty – Eýraziiadaǵy tsifrlyq habqa ainalý. Ol úshin naqty iske kóshý kerek. Ár máselege júieli túrde qarap, batyl sheshimder qabyldap, onyń oryndalýyn qatań baqylaýǵa alý qajet. Men buǵan deiin biryńǵai ulttyq tsifrlyq ekojúie qurý isin tezdetý týraly aittym.
Qajet infraqurylymdy daiyndap, zańnamalyq negiz ben málimetterdi jinaý júiesin ázirlep, jasandy intellektini engizý jumysyn bastaýdy tapsyrdym. Biraq bul tapsyrmalardyń oryndalý barysy máz emes", – dedi Qasym-Jomart Toqaev.
