Almaty oblysy Jambyl aýdany Qarǵaly aýylynda marqum Bolat Nazarbaevtyń týystaryna tıesili záýlim úıge ury túskeni belgili boldy, dep habarlaıdy Dalanews.kz.

EGovpress telegram arnasy taratqan habarlamada úı mańyna kóp polısıa qyzmetkeri jınalǵany aıtylǵan.

“Oqıǵa ornynda qylmys jasaldy degen aldyn ala boljam bar”, - delingen.

Óńirlik polısıa departamenti 14 qarashaǵa qaraǵan túni Qarǵaly aýylynyń turǵyndarynan úıge belgisiz bireýlerdiń kirip, baǵaly zattardyń urlanǵany týraly qońyraý túskenin Stan.kz agenttigine rastady.

Vedomstvonyń málimetinshe, shaqyrtý túsken boıda oqıǵa ornyna jedel-tergeý toby men ýchaskelik polısıa ınspektorlary barǵan. Atalǵan derek boıynsha qylmystyq is qozǵaldy.

“Qazirgi ýaqytta kúdiktilerdi anyqtap, ustaýǵa baǵyttalǵan barlyq qajetti tergeý sharalary júrgizilip jatyr”, – delingen resmı habarlamada.

Polısıa kúdiktilerdi izdeý jumystaryna jeke quram tolyqtaı jumyldyrylǵanyn, sondaı-aq baǵyttamalar jaqyn ornalasqan eldi mekenderge jiberilgenin atap ótti. Alaıda tártip saqshylary urlyq jasalǵan úıdiń naqty kimge tıesili ekenin jarıalaǵan joq.