Eks-prezidenttiń inisi Bolat Nazarbaevtyń esimi biraz daýly ister arqyly belgili. Oǵan qatysty jer máselesi boiynsha da is kóterilgen, - dep habarlaidy Dalanews.kz.
"13 mamyrda Bolat Nazarbaev qaitys bolǵanyna jarty jyl boldy. Onyń biznes imperiiasy kózi tirisinde úlken uly Nurbol Nazarbaevtyń qolyna ótti. Eks-prezidenttiń inisi ósiet qaldyrǵan, ony 2014 jyly jazǵan. Qujat boiynsha barlyq múlik Nurbolǵa berilgen", - dep jazdy CMN.KZ.
Basylym Bolat Nazarbaevtyń aktivteri boiynsha sottarǵa qatysyp, onyń múlki úshin kúres áli nege aiaqtalmaǵanyn anyqtap kórgen.
Bolat Nazarbaevtyń Gúljan, Maira jáne Gúlnur Nazarbaeva esimdi áielderi bolǵany jii aitylady. Basylym málimetine súiensek, Bolat Nazarbaevtyń 20 balasy bar.
"Ol qaitys bolǵan kezde balalardyń kópshiligi kámelet jasyna tolmaǵan nemese joǵary oqý oryndarynda oqyp jatqan. Sonymen qatar, Bolat Nazarbaev Dinara Mámetekovamen nekege turdy. Nurbol Nazarbaevtan bólek, taǵy 14 adam muraǵa úmitker. Al Bolat Nazarbaevtyń ósiet jazyp ketkeni týraly aqparat resmi túrde 2024 jyly 4 qańtarda belgili boldy.
Eks-prezidenttiń inisi qaitys bolǵanǵa deiin Almatynyń Bostandyq aýdandyq sotynda "A" klasty biznes-ortalyq – BNC Plaza jeri úshin sottasqan. Talapker onyń ekinshi áieli Maira Qurmanǵalievanyń ápkesi Gúljamal boldy. Al jaýapker - Bolat Nazarbaevtyń ózi, "PrimeCapital Re Plaza" JShS" - dep jazylǵan basylym málimetinde.
Gýljamal Qurmanǵalidiń aitýynsha, onyń ákesi Saýdabai Qurmanǵaliev kúieý balasyna Timiriazev kóshesindegi biznes-ortalyqtyń ýchaskesin satpaǵan. Ol Bostandyq aýdanynyń sotynan múlikti satyp alý-satý sharty men qabyldaý-berý aktisin jaramsyz dep tanýdy surady.
"Taraptar daýly qujatqa 1999 jyly 25 qyrkúiekte qol qoidy. Ol boiynsha Bolat Nazarbaevqa 1688 sharshy metr úi-jaiy bar 25 sotyq jer bólindi. Jańa múlik úshin eks-prezidenttiń inisi 765 myń teńge tólegen. Kelisim Shymkentte jasalǵan, degenmen olar muny Almatynyń Bostandyq aýdanynda jasaýy kerek edi.
Talapkerdiń advokaty Dmitrii Sazonov sotta basqa satý shartyna silteme jasady. Qujat 1999 jyldyń 29 qyrkúieginde jazylǵan. Ol Nazarbaevpen arada jasalǵan shartqa tórt kún ótken soń jasalypty. Sondai-aq, ýchaskeniń quny men onyń mólsherinde aiyrmashylyq bar. 14 sotyq úshin Saýdabai Qurmanǵaliev 1,6 million teńge tólegen. Al qalǵan 13 sotyqty Daniiar Kesikbaev alǵan, ol - Maira Qurmanǵalievanyń birinshi nekeden týǵan uly", - dep jazylǵan derekte.
Jaǵdaidy túsiný úshin sýdia Áigerim Telbaeva "Almaty azamattaryna arnalǵan Úkimetten" jyljymaityn múlik boiynsha tirkeý isin jáne menshik quqyǵynyń aýysý tarihy bar quqyqtardy tirkeý týraly anyqtamany surady. Qujattar 2023 jylǵy 2 qarashaǵa deiin usynylýy kerek edi. Sondai-aq, sýdia qujat shynaiy ekenin tekserý úshin Shymkent notariattyq muraǵatynan tirkeý notariattyq isin jáne jazbalary bar tirkeý jýrnalyn talap etti.
"Alaida muraǵattan qujattar tabylǵan joq. Notariýs Ǵaziza Bektursynova da mámileni rastai almady. Áiel onyń basqa móri baryn kórsetti. Sonymen qatar, qujatta tegi men ákesiniń aty qate kórsetilgen. Bektursynova tipti politsiiadan onyń derekterin qoldan jasaǵandardy tabýdy talap etti", - dep jazylǵan basylym málimetinde.
Bolat Nazarbaev 2023 jyly 13 qarashada qaitys boldy. Ol kelesi kúni jerlendi. Sýdia Telbaeva osy kúnge sot otyrysyn taǵaiyndady. Advokat Sazonov muragerler anyqtalǵanǵa deiin sot protsesin toqtata turýǵa ótinish bildirdi. Sol kezde Bolat Nazarbaevtyń ókilderi de isti toqtatýdy surady. Keiin sot isti toqtata turýǵa qaýly berdi.
"Memleket muragerlerge aktivterdi rásimdeýge alty ai ýaqyt berdi. Sot osy merzimdi eskerip, 2024 jylǵy mamyrǵa otyrysty josparlady. Otyrys onlain formatta ótti. Sotqa talapkerdiń advokaty Dmitrii Sazonov pen Bolat Nazarbaevtyń burynǵy advokattary - Timýr Ibaidildaev pen Jalǵas Asqarov qosyldy. Endi olar Nurbol Nazarbaevtyń múddesin qorǵaityny belgili boldy.
Sotta Gúljamal Qurmanǵalidyń ókili marqumnyń muragerlerin iske tartý týraly ótinish bildirdi. Sazonov burynǵy prezidenttiń inisiniń múlkine quqyǵy bar 14 esim men familiiany atady", - dep jazylǵan derekte.
"Negizgi jaýapker - ósiet boiynsha murager. Biraq basqalardyń quqyqtary men zańdy múddelerine nuqsan keltirýge bolmaidy, sondyqtan olardy zań boiynsha tartýdy suraimyz", - dedi talapkerdiń advokaty Dmitrii Sazonov.
Jaýapker tarap sottan sheshim shyǵarmai kútýdi surady. Óitkeni muragerlik isti júrgizetin notariýs demalysta bolyp shyqty. Ol Bolat Nazarbaevtyń balalaryna, jubaiyna birde-bir qujat bermegen. Muragerlik týraly kýálik maýsymnyń basynda beriledi.
"Bári úlken uly Nurbol Nazarbaevqa qaldyrylǵany týraly zańdy ósiet bar. Ázirge muragerlik quqyǵy túpkilikti rásimdelmegen, óitkeni birneshe úmitker bar. Bizdiń senimger áli muragerlik quqyǵyna kirgen joq. Sondyqtan isti odan ári qaraýdyń qajeti joq. Biz notariýs kelýin kútýimiz kerek", - dedi Nazarbaevtardyń ókili.
Sýdia Áigerim Telbaeva notariýsty jáne árbir muragerdiń úlesin bólýdi kútpeýdi uiǵary. Onyń pikirinshe, is uzaqqa sozylyp ketken. Muragerlerge óz quqyqtaryn rásimdeýge jetkilikti ýaqyt berilgen. Sýdia sottalýshynyń qaitys bolýyna bailanysty isti toqtatty.
"Muragerler murany ýaqtyly qabyldamady. Otyrysta jaýapkerdiń advokattary Nurbol jáne basqa da birneshe bala murager ekenin aitty. Alaida olar murany qabyldamady, óitkeni muragerlik múlik kóp. Qazir notariýs eńbek demalysynda jáne barlyǵyna zań boiynsha mura týraly kýálik berýge ýaqyty jetpeidi. Eger azamat qaitys bolǵannan keiin quqyqtyq jaǵynan miras berilmese, sot is júrgizýdi toqtatady", - dedi sýdia.
Taraptar sottyń uiǵarymyna apelliatsiialyq shaǵym jasai alatyny belgili boldy. Sonymen qatar, sýdia talapker muragerler anyqtalǵannan keiin taǵy bir ret talap qoiýǵa quqyly ekenin aitty.
"Bul Bolat Nazarbaev pen Qurmanǵalievter otbasynyń Timiriazev kóshesindegi jer úshin bolyp otyrǵan alǵashqy soty emes. Buǵan deiin Maira Qurmanǵalievanyń birinshi nekesinen týǵan uly Daniiar Kesikbaev 25 sotyq jerge ielik etken. Sol kezderde ol Daniiar Bolatuly Nazarbaev boldy.
Bul jerdi oǵan burynǵy prezidenttiń inisi ózi syiǵa tartqan. Daniiar Kesikbaev ýchaskede biznes-ortalyq pen qonaqúi keshenin salady dep boljanǵan bolatyn. Mamandar 2004 jylǵy baǵam boiynsha 25 sotyq jerdi 1 mlrd teńgege nemese 8 million dollarǵa baǵalady.
Maira Qurmanǵalievamen ajyrasqannan keiin eks-prezidenttiń inisi tegin qaitaryp alyp, oǵan qosa Daniiar Kesikbaevqa jasaǵan syilyǵyn qaitarýdy sheshti. 2012 jyly Bostandyq aýdandyq azamattyq ister soty megapolistiń elitalyq aýdanyndaǵy ýchaskeni Bolat Nazarbaevqa qaitaryp berdi", - dep jazdy basylym.
