Atyshýly "Altyn Orda" bazarynan túsetin salyq túsimi artqan. Muny Almaty oblysynyń ákimi Marat Sultanǵaziev málim etti, dep jazady Dalanews.kz.
Oblys ákiminiń aitýynsha, bertinge deiin baqylaýsyz kelgen "Altyn Ordadaǵy" tártip túzelgen. Quqyq qorǵaý jáne salyq organdary tiisti tekserý júrgizgen.
"Bazarda tirkelmegen, tiisinshe salyq tólemegen 200-ge jýyq kásipker anyqtalyp, tizimge endi. Qazir bazardan da, sol jerde jumys isteitin kásipkerlerden de salyq ustalady. Biýdjetke túsetin salyq ótken jyldarmen salystyrǵanda bir jarym esege ósti", – dedi Marat Sultanǵaziev "Massaget" arnasyna bergen suhbatynda.
Oblys ákimi aqshasyn tólese de salynyp jatqan pavilonnan oryn ala almaǵan kásipkerlerdiń janaiqaiynan da habardar.
"Bul jerde jeke kásipker men bazar ákimshiliginiń arasynda kelisim shart jasalǵanyn túsiný kerek. Olar pavilondaǵy orynǵa aqsha tólegen. 300 adam shaǵymdanyp, is qozǵaldy. Keiin uiymdastyrýshy qamaýǵa alyndy. Qazir bazar ákimshiligi saýdagerlerdiń shyǵynyn esepke alyp, qajetti oryndardy qamtamasyz etýge, pavilon qurylysyn jedeldetýge kúsh salýda. Oǵan tolyq ruqsat berilgen.
Qazir bazardyń iesi bir zańdy tulǵa bolsa, ony jalǵa berýmen basqa tulǵa ainalysady. Al jalǵa alýshynyń ústinen qylmystyq is qozǵalyp, tergeý júrip jatyr", – dedi ákim.
Jýrnalistiń "Bazardy Almaty qalasynyń qaramaǵyna ótkizý josparda bar ma?" degen suraǵyna ákim:"Kún tártibinde ondai másele joq" dep qysqa qaiyrdy.
Aita keteiik, "Altyn Orda" – Almaty shekarasyndaǵy alyp bazar. Bul jerden 10 jyldan beri adam aiaǵy arylmai keledi. Buǵan deiin bazardaǵy baǵa men monopoliiaǵa qatysty shý jyly jabylǵanymen, alyp keshenge qatysty máseleler Qańtar oqiǵasynan keiin ashyq aitylyp júr.
2022 jyly sotta "Altyn Ordanyń" reiderlik jolmen basyp alynǵany belgili boldy.
Sot anyqtaǵandai, 2012 jyly bazardyń úlesi eks-prezident Nursultan Nazarbaevtyń qaitys bolǵan inisi Bolat Nazarbaevtyń atyna jazylǵan. Keiin 95 paiyzy «Kompaniia Number One» JShS-ne satylǵan. Onyń iesi Astanadaǵy ekonomikalyq tergeý departamentiniń burynǵy basshysy Erkebulan Hamzin bolyp shyqty. Qujat boiynsha 2 113 750 000 teńgege mámile jasalǵan. Úlestiń tek 5 paiyzy Daniiar Álpievtiń qolynda bolǵan.
Buǵan deiin ol "Alaiaqtyq" baby boiynsha sottaldy, endi sol bap boiynsha ústinen taǵy da qylmystyq is qozǵalyp otyr.
Eske salaiyq, Bolat Nazarbaev – tuńǵysh prezident Nursultan Nazarbaevtyń joǵary memlekettik qyzmette tóbe kórsetpegen sirek týysynyń biri. Alaida ol Qazaqstandaǵy eń bai adamdardyń tiziminde boldy. Qańtar oqiǵasynan keiin Nazarbaevtar áýleti joǵarǵy bilikke yqpalynan aiyrylǵan soń Bolat Nazarbaev pen onyń aktivterine bailanysty daý shyǵyp, keibir isteri sotqa deiin jetti. Sonyń biri – bazar daýy edi. Ókinishke qarai, sheneýnik sozylmaly dertten 13 qarashada Almatynyń ortalyq aýrýhanasynda qaitys boldy. Soǵan qaramastan marqum Bolat Nazarbaevtyń tiri kúninde istegen qylmystaryna qatysty aryzdar áli kúnge deiin túsip jatyr desedi. Bul týraly jaqynda Májilis kýlýarynda BAQ ókilderiniń biri Ádilet ministri Azamat Esqaraevtan marqumnyń tóńiregindegi daýǵa aldaǵy ýaqytta kim jaýap beretinin de suraǵan bolatyn.
Jýrnalistiń "Bolat Nazarbaevtyń qylmysyna aldaǵy ýaqytta kim jaýap beredi?" dep qoiǵan suraǵyna ministr "Bul is boiynsha quqyq qorǵaý organdaryna júgine alasyz. Biz – azamattyq organbyz. Bul suraq meniń quzyretime kirmeidi", - dep qysqa jaýap qaiyrǵan edi.
