1998 jyldan beri múlikti baǵalaý qyzmetinde eńbek etip kele jatqan Aleksandr Kalinin marqum Bolat Nazarbaev jekeshelendirip alǵan ǵimarat qalai memleketke qaitarylǵanyn aityp berdi.
Áńgime Almatydaǵy aýyr mashina jasaý zaýyty jaily bolmaq. Keńes zamanynda ony «otandyq mashina jasaýdyń flagmany» dep ataityn.
Bul zaýytty kezinde marqum Bolat Nazarbaev túrli joldarmen iemdenip, jekeshelendirip alǵan. Jaqynda bul zaýyt memleket menshigine qaitaryldy. Aleksandr Kalinin Barys media-ǵa bergen suhbatynda bul protsess qalai júzege asqanyn, qandai protsester bolǵanyn aityp berdi.
"Iá, rasynda da, eki jarym jyldan astam ýaqyt boiy bul biregei, alyp kásiporynǵa qatysty sot protsesi júrdi. Almatyda ornalasqan, óndiristik mańyzy bar eń iri bazalyq kásiporyndardyń biri bolatyn. Qazirgi tańda sot úkimi zańdy kúshine endi. Bul kásiporynda úsh negizgi menshik iesi bolǵan. Solardyń ekeýinen menshik quqyǵy alynyp, múlik Almaty qalasynyń Memlekettik múlik jáne jekeshelendirý komitetine berildi. Eger naqty sandarǵa júginsek, jalpy jer kólemi - 38,4 gektar", - deidi Kalinin.
Barlyǵy 93 ǵimarat bolǵan.
"Sonyń ishinde shamamen 4 gektar jer áli de satyp alynbaǵan, sebebi bir obekt boiynsha sot protsesi júrip jatyr. Sonymen qatar oǵan japsarlas 13 kásiporyn bar. Qalǵan barlyq aktivter jekeshelendirildi. Sot úkimi kúshine endi. Iaǵni, olar memleket menshigine qaitarylyp, jekeshelendirý protsesinen ótti. Olardy memlekettik balansqa tirkeý úshin bizge júgindi. Biz mindetti túrde baǵalaý júrgizdik. Bul aktivter jer telimderi men sol 82 ǵimarattan turdy. Jalpy baǵalaý somasy - 15,5 milliard teńge. Bul sol kezdegi baǵammen 30,3 million dollar shamasynda. Al memleketke tikelei ótken úles 31,9 paiyzdy qurady. Iaǵni, memleket óz balansyna 9,7 million dollardyń múlkin qabyldady", - deidi múlikti baǵalaýshy.
Aleksandr Kalinin Bolat Nazarbaevtan aktivti qaitarý protsesi nege uzaqqa sozylǵanyn túsindirdi.
"Eń basty sebep - negizgi iesiniń marqum bolǵany. Oǵan kásiporynnyń shamamen 70 paiyzy tiesili bolǵan. Onyń týystary, burynǵy áieli Maira Qurmanǵalieva jáne basqa adamdar… Aty-jónderin atap jatýdyń qajeti joq, asa tanymal emes. Sondai-aq tehnikalyq qyzmetkerler, oryndaýshylar da bolǵan. Prokýratýra úlken jumys atqarǵanyn aitýymyz kerek. Keiin baǵalaý júrgizilgen joq, biraq olar barlyq qujattardy muqiiat zerttedi. Baǵalaýmen ainalysqanda, barlyq qujattardyń tolyq toptamasyn alasyz. Sizge senimdi túrde aita alamyn - bul kóp tomdar. Meniń keńsemde sondai úlken papkalar boldy. Biz ulym Artem ekeýimiz sol qujattardy qarap, kóp nársege kóz jetkizdik", - deidi spiker.
Kalininniń sózinshe, Bolat Nazarbaev ǵimarattardy jekeshelendirip alyp, jalǵa berip otyrǵan.
"Biraq keiin ol jer telimderi boiynsha jalǵa alý quqyǵymen ǵana qoldanǵan. Jerdiń ózin satyp almaǵan. Bul – mámilelerdiń zańsyz ekenin dáleldeitin negizgi sebepterdiń biri boldy. Sodan soń zańgerler basqa kelisimsharttardy da qarai bastady, jáne túrli sipattaǵy kóptegen sharttarda eleýli zań buzýshylyqtar anyqtaldy. Biraq ózińiz bilesiz, ol – ataqty adam bolǵan. Ómir súrip júrgen kezinde bul protsesti ózi baqylaýda ustaǵan. Aita ketý kerek, prokýratýra bul iste óte jaqsy jumys atqardy. Sotta olar dáleldep berdi – bul jaǵdai shynymen osylai bolǵanyn", - deidi ol.
Al úshinshi menshik iesine olar saq, abailap áreket etken.
"Jer telimin tipti satyp alyp alǵan. Sondyqtan bul másele áli de sotta qaralyp jatyr. Olar sol aýmaqty áli de paidalanyp otyr", - deidi maman.
Sarapshy ǵimarattyń naryqtaǵy quny týraly aitty.
"Men árdaiym aityp júretinmin: maǵan belgili bir kúnge – iaǵni jekeshelendirý bolǵan kúnge – baǵalaý júrgizý tapsyrylatyn. Sol kúndegi jaǵdaimen bul jekeshelendirý durys pa, álde durys emes pe – sony salystyryp anyqtaimyn. Al bul jaǵdaida maǵan múlde basqa mindet júkteldi. Jekeshelendirý bolǵan kúnge baǵalaý jasaýdyń qajeti bolmady, túrli sebepterge bailanysty. Sondyqtan meniń aldyma qoiylǵan mindet – osy qalǵan múlikterdi, eń aldymen jer telimderin, ǵimarattardy qazirgi kúnge baǵalaý edi. Bul málimetter keiin jekeshelendirý komitetiniń balansyna engizilýi kerek boldy. Biz baǵalaýdy dál osy kúnge júrgizdik. Sol esep boiynsha jalpy quny 15 milliard teńge nemese 30 million dollar shamasynda. Onyń ishinde jer teliminiń úlesi – 88% boldy", - deidi sarapshy.
Aleksandr Kalininniń sózinshe, ǵimarattardyń ózi onsha qundy emes.
