El Táýelsizdiginiń 30 jyldyǵynda talaı-talaı bel-belesterden asyp, alýan-alýan ıgi ister men jańa bastamalardyń, sony jetistikterdiń kýási bolsaq, sonyń biri – Qazaqstan jastaryn ǵalamdyq eń úzdik ýnıversıtetterde oqytýǵa arnalǵan «Bolashaq» baǵdarlamasynyń ómirge kelýi bolatyn. Shańyraǵyn jańa kótergen jas memleketimizdi damytý úshin álemdik ınovasıalyq tehnologıalardy tereń meńgergen bilikti mamandar kóp qajet ekenin eskergen Tuńǵysh Prezıdentimiz N.Á.Nazarbaev el ekonomıkasynyń táltirektep turǵan qıyn kezine qaramaı 1993 jylyǵy 5 qarashada «Bolashaq» baǵdarlamasyn qurý týraly № 1394 qaýlysyna qol qoıdy. Sonyń arqasynda Qazaqstan jastary shetelderge oqýǵa 1994 jyldan jiberile bastady.

«Bolashaq» baǵdarlamasyn bekitkenimiz durys bolǵanyn ómirdiń ózi kórsetip otyr, -- dep eske alǵan edi sol kúnderdi Elbasymyz N.Á.Nazarbaev.  – Elimiz úshin eń kúrdeli bolǵan 1993 jyly qarttarǵa zeınetaqysyn bere almaı jatqan kezde, muǵalimder men dárigerlerge, áskerılerge aılyǵyn tóleı almaı jatqan tusta jastarymyzdy álemniń eń úzdik oqý oryndaryna jiberip jattyq. Memleketimiz árbir jas úshin jyl saıyn 30-50 myń AQSH dollary kóleminde aqy tólep otyrdy». Ia ár qıyndyqtyń óz qaıyry bolady. Jyldar óte sol qıyndyqtardyń bári eńserilip, shetelderge oqýǵa ketken jastarymyz elimizge qaıtyp oralyp, óz bilimderin halyq ıgiligi úshin jumsaı bastady. Qazir qarap otyrsaq, 1994 jyldan beri 14156 stependıa taǵaıyndalypty. Bul osynshama jas shetelderden bilikti maman bolyp oraldy degen sóz.

Búginde «Bolashaq» baǵdarlamasynyń áleýeti artyp, aýqymy keńeıgen shaq. Bıyldyń ózinde Qazaqstan boıynsha 1055 stependıa bólinip otyr. Onyń 500-i ǵalymdarymyzǵa sheteldik ǵylymı ortalyqtar men úzdik ýnıversıtetterde taǵylymdamadan ótý úshin. 555-i jastarymyzdy bakalavrıatta, magıstratýrada jáne Phd doktorantýrada oqytý úshin beriledi.

Keshe QR Bilim jáne ǵylym mınıstrligi janyndaǵy Halyqaralyq baǵdarlamalar ortalyǵynyń prezıdenti Aınur Baǵdatqyzy Káribozova men Abaı atyndaǵy Qazaq ulttyq pedagogıkalyq ýnıversıtetiniń Basqarma Tóraǵasy-Rektory Darhan Nurlanuly Bilálov «Bolashaq» baǵdarlamasy boıynsha shetelderde oqýǵa talapkerler men taǵylymdamadan ótýge oqytýshylar jiberý týraly memorandýmǵa qol qoıdy.

Biz eki uıymnyń basshylary Aınur Baǵdatqyzy da, ýnıversıtettiń jańa rektory, men de, «Bolashaq» baǵdarlamasynyń túlekterimiz, -- dedi Abaı ýnıversıtetiniń basshysy Darhan Bilálov. Sheteldik úzdik ýnıversıtetterde bilim alyp, bilikti maman bolyp oralǵan jastarǵa qaı kezde de jol ashyq. Sondyqtan «Bolashaq» baǵdarlamasymen sheteldik úzdik ýnıversıtetterde oqımyn degen jastarymyzdy men árdaıym qoldaımyn.

Halqaralyq baǵdarlamalar ortalyǵynyń prezıdenti A.Káribozova jastardy «Bolashaq» baǵdarlamasy boıynsha oqýǵa túsýdiń sharttarymen tanystyrdy.

Abaı atyndaǵy QazUPÝ Qoǵammen baılanys bólimi