Elge kelip qyzmet etýdiń ornyna shetelge ketip qalǵan Bolashaq túlegi aqshany qaitarýǵa mindetteldi, dep habarlaidy Dalanews.kz.
Talap qoiýshy 2017 jyly «Bolashaq» halyqaralyq stipendiia baǵdarlamasy boiynsha Ulybritaniianyń bir ýniversitetinde magistratýra dárejesin alǵan. 5 jyl ótkennen keiin stipendiat ýákiletti organdarǵa kepilge salynǵan múlikti aýyrtpalyqtan bosatý týraly ótinishpen júgingen. Alaida oǵan baǵdarlama erejelerinde kózdelgen mindetti eńbekpen óteýdi oryndamaǵany úshin bas tartylǵan.
Baǵdarlama sharttaryna sáikes, túlekter Astana nemese respýblikalyq mańyzy bar qalalarda keminde 5 jyl (1825 kún), nemese basqa aimaqtarda 3 jyl (1095 kún) jumys isteýge mindetti.
Talap qoiýshynyń shetelde oqýyn aiaqtaǵannan keiin Astanadaǵy uiymdardaǵy eńbek ótili 1489 kúndi nemese belgilengen merzimniń 82%-yn qurady. Ol mindettemelerin aiaqtamai, 2021 jyldyń sáýir aiynan bastap Qazaqstannan ketken. Talap qoiýshy eńbek mindettemelerin oryndamaýdyń saldary týraly eskertýlerdi elemegen.
Shetelde 336 kún qashyqtan jumys isteýdi esepke alý áreketi sotpen qabyldanbady. Sot eńbekpen óteý túlekterdiń Qazaqstanda shyn máninde fizikalyq turǵydan bolýyn talap etedi dep uiǵardy. Talap qoiýshynyń qol qoiǵan kelisimshartynda qashyqtan jumys isteý qarastyrylmaǵan, al bul másele boiynsha taraptar arasynda kelisimshart jasalmaǵan.
Sot sondai-aq «Bolashaq» baǵdarlamasynyń maqsaty – bilikti mamandardy el ekonomikasyna innovatsiialyq tehnologiialardy engizý úshin elge qaitarý ekenin atap ótti. Eńbek kodeksindegi qashyqtan jumys isteýge qatysty ózgeristerge qaramastan, «Bolashaq» baǵdarlamasy erekshe bolyp tabylady jáne túlekterdiń Qazaqstanda bolýy mindetti dep sanalady. Baǵdarlama erejelerinde qashyqtyqtan jumys isteý týraly ózgerister men tolyqtyrýlar engizilmegen.
Keiinnen shetelde kadrlar daiarlaý jónindegi Respýblikalyq komissiia eńbek mindettemelerin oryndamaýyna bailanysty talap qoiýshyny stipendiiadan aiyryp, oqytýǵa jumsalǵan qarajatty qaitarýdy talap etti. Ol Komissiianyń sheshimin de daýlap, sotqa shaǵymdanǵan.
Sot komissiianyń sheshimi onyń quzyreti sheginde qabyldanǵanyn jáne talap qoiýshynyń baǵdarlama boiynsha mindettemelerin oryndamaý týraly zańdy kúshine engen sot sheshimine silteme jasap, talapty qanaǵattandyrýdan bas tartty.
Sheshim zańdy kúshine endi.
