Endi atom salasynda jumys isteitin qazaqstandyqtar "Bolashaq" baǵdarlamasy arqyly shetelde magistratýra, doktorantýra oqýǵa jáne taǵylymdamadan ótýge bólek kvota boiynsha qatysa alady, dep habarlaidy dalanews.kz.
Bul múmkindik atom energetikasyn retteý, ýran óndirý, atom ónerkásibi, atom nysandaryn jobalaý, salý jáne paidalaný salasynda eńbek etetin mamandarǵa beriledi. Sondai-aq jańa tehnologiia jasap júrgen jáne radiofarmpreparat óndiretin qyzmetkerler de osy sanatqa kiredi.
Baǵdarlamaǵa qatysý úshin úmitkerdiń keminde 3 jyl eńbek ótili bolýy kerek. Onyń sońǵy 6 aiy tikelei osy salada jumys isteýi qajet.
Oqýyn aiaqtaǵannan keiin maman Qazaqstanǵa oralyp, óz uiymynda nemese onyń filialynda keminde 3 jyl jumys isteýge mindetteledi.
Budan bólek, jumysynda jasandy intellektini qoldanatyn mamandar úshin de talap jeńildetildi. Endi olarǵa qajet eńbek ótili 12 aidan 6 aiǵa deiin qysqardy.
