Ázirshe shyǵysqazaqstandyq fristailshymyz Iýliia Galyshevadan basqa sportshymyz medalge qol jetkizgen joq. Iýliia qyzymyz qola medaldi qanjyǵasyna bailap, sónip bara jatqan úmitimizdi jaqqandai boldy. Al qalǵan sportshylarmyz qara úzip, úzdikterdiń qataryna qosylǵan joq.
Aitpaqshy, Aq Olimpiada bastalǵan sátte Phenchhan qalasyna sportshylarymyzben birge baryp, olarǵa bas-kóz bolyp júrgen Qazaqstannyń Ulttyq Olimpiada komiteti Sport direktsiiasynyń basshysy Elsiiar Qanaǵatov aǵamyzdyń "Qazaqparat" agenttigine bergen "Qazaqstandyq sportshylar Phenchhanǵa qazy-qarta ala keldi" degen suhbatyn oqyp, sportshylarymyz bairaqty básekege as iship, aiaq bosatý úshin barady ma dep oiǵa qalǵanymyzdy jasyryp qaitemiz.
Qazaqstandyq sportshylardyń shetelge shyqsa sómkesin qazy-qartaǵa toltyryp, azyǵyn arqalap júretini biz úshin jańalyq emes.
Sońǵy ýaqyttary qysqy, jazǵy Olimpidaǵa attanyp bara jatqan sportshylarymyz "qazy-qarta men jal-jaiamyzdy alyp bara jatyrmyz" dep reti kelse de, kelmese de áńgime aitatyn ádet paida boldy. Bul ne? Et jep, sorpa soraptaý ulttyq patriotizmniń bir nyshany ma?
Memleket sportshylarymyzdy meshkeilerdiń jarysyna jibergendei ishken-jegenin sóz qylatyn ádetterin túsine almai júrmiz. Olardyń áńgimesin estigende aýyldaǵy týǵan-týysqannyń basyn qosyp, soǵym basyn beretin Sársembai kókemizdiń áreketi eske túsetinin jasyryp qaiteiin.
Olar qysta qazyny kertip jep, uzaq túnde jylqy baǵatyn jylqyshy emes qoi.
Sportshylardyń "Jarysqa qazy-qarta men jal-jaiany ala kettik. Ulttyq taǵamymyz bizge kúsh-qýat beredi" dep lepire sóilegenine kúdikpen qaraityn boldyq. Olardyń bóten jerge jarysqa barǵanda et asyp, arqa-jarqa bolyp otyratyn jaǵdaida bola ma, deseńizshi?
Álde sport salasyna jaýapty shendilerimiz et asatyn qazan-oshaǵyn aldyn ala aparyp, sailap qoia ma eken? Kim bilsin? Bir bilse "Qazaqstandyq sportshylar Phenchhanǵa qazy-qarta ala keldi" dep suhbat bergen Elsiiar aǵamyz biletini anyq.
Nurlan JUMAHAN,
jýrnalist, bloger
