Almaty qalasynyń Almaly aýdandyq sotynda Freedom Finance kompaniiasynyń talap-aryzy boiynsha ótip jatqan sot otyrysynda jábirlenýshi taraptyń kýágeri Gúlmira Isaeva jaýap berdi. Ol 2025 jylǵy 3 sáýirde jábirlenýshilerdiń ne úshin KazTAG redaktsiiasyna barǵanyn aityp berdi, dep habarlaidy dalanews.kz.
Kýágerdiń aitýynsha, sol kúni ol advokat Svetlana Oralbaeva jáne basqa da jábirlenýshilermen birge Freedom Finance kompaniiasynyń atqarýshy direktory Vitalii Svetovoi men kompaniianyń Ózbekstandaǵy burynǵy akademiia basshysy Temirlan Bekovke qatysty qozǵalǵan qylmystyq ister týraly aitý úshin KazTAG redaktsiiasyna barǵan.
Isaeva sotta óziniń qart ákesi Qurman Isaevtyń Vitalii Svetovoidyń áreketinen qarjysynan aiyrylǵanyn málimdedi. Onyń aitýynsha, basqa da egde jastaǵy salymshylar, onyń ishinde 85 jastaǵy áiel de jinaǵan qarajatynan aiyrylǵan.
Sotta belgili bolǵandai, buǵan deiin jábirlenýshiler Astanada Ekonomikalyq tergep-tekserý departamentinde Freedom Finance ókilderimen kezdesý ótkizbek bolǵan. Alaida kezdesý ótpegen soń, olar buqaralyq aqparat quraldaryna júginýge sheshim qabyldaǵan.
Gúlmira Isaevanyń aitýynsha, KazTAG redaktsiiasynyń bailanys nómiri 2GIS servisi arqyly tabylǵan.
Ol bas redaktor Ámir Qasenov alǵashqyda memlekettik organdarǵa júginýge keńes bergenimen, jábirlenýshilerdiń tabandy ótinishinen keiin kezdesýge keliskenin aitty.
Sottaǵy kýágerdiń sózinshe, redaktsiiaǵa kelgennen keiin Ámir Qasenov barlyq qatysýshydan jeke kýálikterin, qylmystyq iske qatysty qujattaryn jáne advokattyń qujattaryn kórsetýdi suraǵan.
«Ámir: “Maǵan qujattar men faktiler kerek. Men tek sizder kelgen aqparattyq alańmyn”, dedi», - dep jetkizdi Isaeva.
Onyń aitýynsha, suhbat bastalar aldynda bas redaktor telefon arqyly beinejazba júrgiziletinin eskertip, jariialanatynyn aldyn ala aitqan.
Kýágerdiń sózinshe, redaktsiiaǵa suhbat berýge bastamashy bolǵan jábirlenýshilerdiń ózderi.
«Bizdi barlyq jerde keri qaitardy. Sondyqtan bizdi estisin dep keldik. Maqsatymyz jarnama jasaý emes edi», - dedi Isaeva.
Sondai-aq ol qatysýshylardyń eshqaisysy ortaq stsenarii nemese biryńǵai nusqa daiyndamaǵanyn aitty.
«Árkim ózi úshin jaýap berdi. Árqaisysy óz jaǵdaiyn aityp, óz qujattaryn kórsetti», - dedi kýáger.
Buǵan deiin Freedom Finance ókili Egor Trofimov jábirlenýshiler kompaniiaǵa qarsy uiymdasqan aqparattyq naýqan júrgizdi dep málimdegen bolatyn. Alaida Gúlmira Isaeva bul pikirmen kelispeitinin aityp, jábirlenýshiler basqa da buqaralyq aqparat quraldaryna júgingenimen, olardyń keibirinde daiyndalǵan materialdar efirge shyqpaǵanyn jetkizdi.
Sot otyrysynda ákesiniń jáne ózge de salymshylardyń shyǵyny týraly aitqan kezde Gúlmira Isaeva kóz jasyna erik berdi.
«Olar osy máseleni jariialaǵannan keiin ǵana is qozǵala bastady. Oǵan deiin óte qiyn boldy», - dedi ol.
