Qazaqstanda áleýmettik jeli arqyly lotereia uiymdastyrǵan birqatar bloger men tanymal tulǵa jaýapkershilikke tartyldy. Olardyń qatarynda Qairat Nurtastyń anasy Gúlzira Aidarbekova, aktrisa ári bloger Ásel Asqar, sondai-aq Arýjan Ábilova, Aiym Altynbekova jáne Eldos Qadirhanov bar, dep habarlaidy dalanews.kz.
Týrizm jáne sport ministrliginiń málimetinshe, 2026 jyldyń alǵashqy segiz aiynda lotereia týraly zańnamany buzǵan 69 áleýmettik jeli akkaýnty anyqtalǵan.
Olar Ákimshilik quqyq buzýshylyq týraly kodekstiń 445-babynyń 1-bóligi – "Qazaqstan Respýblikasynyń lotereialar jáne lotereia qyzmeti týraly zańnamasyn buzý" boiynsha ákimshilik jaýapkershilikke tartylǵan.
Eń iri aiyppul "aitoli_aktau" akkaýntyna salynǵan. Onyń kólemi 525 AEK nemese 2 064 300 teńgeni qurady. Al eń tómengi aiyppul 50 AEK, iaǵni 196 600 teńge bolǵan.
Gúlzira Aidarbekovaǵa 196 600 teńge aiyppul salyndy. Ásel Asqar 648 750 teńge tóleýge mindettelgen.
Sondai-aq bloger Arýjan Ábilovaǵa, Eldos Qadirhanovqa jáne "aekaposh" laqap atymen tanymal Aiym Altynbekovaǵa 648 750 teńgeden aiyppul salynǵan.
Budan bólek, ministrlik málimetinde taǵy birneshe tanymal áleýmettik jeli akkaýntynyń lotereia zańnamasyn buzǵany úshin jaýapkershilikke tartylǵany kórsetilgen.
