Almatyda Qazaqstan halqy Assambleiasynyń 30 jyldyǵyna orai Qazaqstan halqynyń birligi kúni keń kólemde atalyp ótti. Merekelik baǵdarlama «Birligi jarasqan Almaty» degen ataýmen ótti,- dep habarlaidy Dalanews.kz
Basty is-shara Abai atyndaǵy alańda, Respýblika saraiynyń aldynda uiymdastyrylyp, myńdaǵan qala turǵyny men qonaǵy jinaldy. Kúnniń basty oqiǵalarynyń biri - 11.00-den bastalyp, 21.00-ge deiin sozylatyn kontsert. Merekege qala ákimi Erbolat Dosaev qatysty.
Sahnadaǵy atmosferany qazaqstandyq estrada juldyzdary – L Duo dýeti, pianist Ratovich , «Dervishi» jáne Madein KZ toptary jáne basqalar jasady. Kontserttiń hedlainerleri QR Halyq ártisi Roza Rymbaeva men Bashqurtstannan kelgen Ay Yola toby boldy.
Merekelik is-sharalar Almatynyń barlyq aýdanynda ótti: etnomádeni birlestikter qonaqtardy ulttyq bi bilep, án aityp jáne dástúrli taǵamdar usyndy. Sonymen qatar, qalada jármeńkeler, sporttyq týrnirler, aýla kontsertteri men ekologiialyq aktsiialar uiymdastyryldy.
Mektep oqýshylarynan bastap zeinetkerlerge deiin 300 – ge jýyq adam qatysqan Tuńǵysh Prezident saiabaǵyndaǵy «Birlik júgirisi» birliktiń simvoly boldy. Al Abai alańynda eldi erekshe qyzyqtyrǵan nysannyń biri Qazaqstan halqy Assambleiasynyń tarihyna arnalǵan «Halyqtar birligi nazarda» atty fotokórmesi edi.
«Birlik kúni – bizdiń basty kúshimiz – mádeni ártúrlilik ekenin eske salatyn kún. Almaty — ultaralyq kelisim men dostyqtyń qalasy. Assambleianyń mereitoilyq jylynda árbir turǵyn ózin úlken, uiymshyl qoǵamnyń bir múshesi retinde sezinýi úshin jumysymyzdy jalǵastyramyz. Bul qoǵamda mádeniet, dástúr men ózara qurmet eń joǵary qundylyq sanalady», – dedi Almaty qalasy Qazaqstan halqy Assambleiasy tóraǵasynyń orynbasary Vsevolod Lýkashev.
Qazaqstan uiǵyrlarynyń respýblikalyq mádeni ortalyǵynyń tóraǵasy Abdýlhalil Dolkýntai:
«Bul kún – biz úshin jai ǵana mereke emes, ortaq tarih pen taǵdyrdyń simvoly. Biz árbir ult dástúrin saqtap, el damýyna úles qosa alatyn memlekette ómir súrip jatqanymyzdy maqtan tutamyz. Mundai is-sharalar ózara túsinistik pen mádeni alýandyqtyń elimizdiń bolashaǵy úshin qanshalyqty mańyzdy ekenin kórsetedi», – dedi.
Keshke Abai alańyndaǵy kontsertte Aiqyn Tólepbergen, Búrkit, «Marsel» toby jáne basqa da ártister óner kórsetedi dep kútilýde.
