Ekpeni alǵashqylardyń biri bolyp №27 mektep-lıseıiniń qazaq tili men ádebıeti pániniń muǵalimi Zıbagúl Qarataeva qabyldady. Osyǵan deıin ol dárigerdiń tıisti tekserisinen ótken bolatyn.
– Men vaksınasıany óz erkimmen qabyldadym. Bul eń aldymen ózińdi jáne týystaryńdy qorǵaý úshin qajet shara. Otbasymda koronavıýrs ınfeksıasymen aýyrǵan eshkim joq jáne juqtyrmas úshin osyndaı tańdaý jasadym. Bul óz densaýlyǵyma degen jaýapkershilik, – deıdi muǵalim.
Sonymen qatar, Zıbagúl Qarataeva vaksına qabyldaý kezinde eshqandaı qorqynysh bolmaǵanyn da aıtty.
– Dárigerlerdiń vaksına qabyldaǵany jaıly qanshama aqparat tarady, bárin oqyp otyrdyq, jaǵdaıdy nazarda ustadyq. Jaǵymsyz jaǵdaılar bolǵan joq. Sol sebepti senimdi boldym, – dep túsindirdi muǵalim.
Vaksınanyń birinshi komponentin №27 orta mektep-lıseıiniń dırektory Qanat Baısalbaev ta qabyldady. Ol ózin jaqsy sezinetinin, keri áserleri bolmaǵanyn jetkizdi.
– Eger biz ınfeksıanyń taralýyn qalamasaq, ekpe qabyldaýymyz qajet. Onyń ústine oqýshylar birtindep synyptaryna oralyp jatyr. Al olardyń ata-analarymen biz kún saıyn kezdesip turamyz. Bir-birimizdi qaterge tigýge bolmaıdy. Men mektep dırektory retinde ekpe alyp, áriptesterime úlgi kórsettim, – dep atap ótti Qanat Baısalbaev.
Raıymbek batyr atyndaǵy №50 mektep-lıseıiniń tarıh pániniń muǵalimi Saılaýbaı Shaıkenov memleket usynǵan tegin vaksınasıadan ótýdi azamattyq paryzy sanaıdy.
– Memleket bizge qamqorlyq jasap, vaksınasıalaýdy usynyp otyr. Ótken jyl búkil adamzat úshin qıyn kezeń boldy. Vırýstyń saldarynan qanshama adam qaıtys boldy. Vaksınanyń tıimdiligine senbesem, bul jerde otyrmas edim. Ózimdi, otbasymdy jáne oqýshylarymdy qaterden qorǵaǵym keledi, – deıdi tarıhshy.
https://www.youtube.com/watch?v=61wEB2reOrs&feature=emb_logo
