ەكپەنى العاشقىلاردىڭ ءبىرى بولىپ №27 مەكتەپ-ليسەيىنىڭ قازاق ءتىلى مەن ادەبيەتى ءپانىنىڭ ءمۇعالىمى زيباگۇل قاراتايەۆا قابىلدادى. وسىعان دەيىن ول دارىگەردىڭ ءتيىستى تەكسەرىسىنەن وتكەن بولاتىن.
– مەن ۆاكسيناسيانى ءوز ەركىممەن قابىلدادىم. بۇل ەڭ الدىمەن ءوزىڭدى جانە تۋىستارىڭدى قورعاۋ ءۇشىن قاجەت شارا. وتباسىمدا كوروناۆيۋرس ينفەكسياسىمەن اۋىرعان ەشكىم جوق جانە جۇقتىرماس ءۇشىن وسىنداي تاڭداۋ جاسادىم. بۇل ءوز دەنساۋلىعىما دەگەن جاۋاپكەرشىلىك، – دەيدى ءمۇعالىم.
سونىمەن قاتار، زيباگۇل قاراتايەۆا ۆاكسينا قابىلداۋ كەزىندە ەشقانداي قورقىنىش بولماعانىن دا ايتتى.
– دارىگەرلەردىڭ ۆاكسينا قابىلداعانى جايلى قانشاما اقپارات تارادى، ءبارىن وقىپ وتىردىق، جاعدايدى نازاردا ۇستادىق. جاعىمسىز جاعدايلار بولعان جوق. سول سەبەپتى سەنىمدى بولدىم، – دەپ ءتۇسىندىردى ءمۇعالىم.
ۆاكسينانىڭ ءبىرىنشى كومپونەنتىن №27 ورتا مەكتەپ-ليسەيىنىڭ ديرەكتورى قانات بايسالبايەۆ تا قابىلدادى. ول ءوزىن جاقسى سەزىنەتىنىن، كەرى اسەرلەرى بولماعانىن جەتكىزدى.
– ەگەر ءبىز ينفەكسيانىڭ تارالۋىن قالاماساق، ەكپە قابىلداۋىمىز قاجەت. ونىڭ ۇستىنە وقۋشىلار بىرتىندەپ سىنىپتارىنا ورالىپ جاتىر. ال ولاردىڭ اتا-انالارىمەن ءبىز كۇن سايىن كەزدەسىپ تۇرامىز. ءبىر-بىرىمىزدى قاتەرگە تىگۋگە بولمايدى. مەن مەكتەپ ديرەكتورى رەتىندە ەكپە الىپ، ارىپتەستەرىمە ۇلگى كورسەتتىم، – دەپ اتاپ ءوتتى قانات بايسالبايەۆ.
رايىمبەك باتىر اتىنداعى №50 مەكتەپ-ليسەيىنىڭ تاريح ءپانىنىڭ ءمۇعالىمى سايلاۋباي شايكەنوۆ مەملەكەت ۇسىنعان تەگىن ۆاكسيناسيادان ءوتۋدى ازاماتتىق پارىزى سانايدى.
– مەملەكەت بىزگە قامقورلىق جاساپ، ۆاكسيناسيالاۋدى ۇسىنىپ وتىر. وتكەن جىل بۇكىل ادامزات ءۇشىن قيىن كەزەڭ بولدى. ۆيرۋستىڭ سالدارىنان قانشاما ادام قايتىس بولدى. ۆاكسينانىڭ تيىمدىلىگىنە سەنبەسەم، بۇل جەردە وتىرماس ەدىم. ءوزىمدى، وتباسىمدى جانە وقۋشىلارىمدى قاتەردەن قورعاعىم كەلەدى، – دەيدى تاريحشى.
https://www.youtube.com/watch؟v=61wEB2reOrs&feature=emb_logo
