Amantai qajy ózine qarsy qozǵalǵan isti “paraqorlardyń ailasy” dep atady, dep habarlaidy Dalanews.kz.
Qoǵam belsendisi áýelde oqiǵa bolǵan jerde bolmaǵanyn aitty. Keiinirek ol sol jerde bolǵanyn moiyndady.
“Meni qushaqtamaq boldy, men qolymdy iterip jiberdim. Ol qulap bara jatyp, meni ustaidy dep oilaǵan. Áielge tán qýlyq qoi. Al men oǵan kómektespei, óz sharýammen ketip qaldym. Bireý ony satyp alǵan. Aqsha úshin”, – dedi Amantai qajy Tengrinews.kz agenttigine bergen suqbatynda.
Aita keteiik, kúni keshe Almatyda 83 jastaǵy Amantai qajyǵa qatysty qylmystyq is qozǵaldy.
Tergeý málimetinshe, ol 76 jastaǵy áieldi baspaldaqtan iterip jibergen. Saldarynan jábirlenýshi jambasyn syndyryp, aýrýhanaǵa túsken.
Atalǵan fakti boiynsha Qylmystyq kodekstiń 107-baby (“Densaýlyqqa qasaqana ortasha aýyrlyqtaǵy ziian keltirý”) boiynsha is qozǵaldy. Kinási dáleldense, oǵan 2 jylǵa deiin bas bostandyǵynan aiyrý jazasy taǵaiyndalýy múmkin.
Eske salaiyq, “Attan” antiiadrolyq qozǵalysynyń belsendisi Amantai qajy 76 jastaǵy áieldi baspaldaqtan iterip jiberdi degen kúdikke ilingen edi. Jábirlenýshiniń qyzy Raisa Besqaraǵaeva anasynyń jaǵdaiyna qatty alańdaýly ekenin aityp, oqiǵanyń mán-jaiyn baiandady.
“Ol bastapqyda kúzetshimen sóilesip turǵan. Sol sátte Amantai qajy kelip, amandasyp, ishke ótpek bolǵan. Anam: «Juma qabyl bolsyn» dep, jolyn berip, aldymen ótkizip jiberedi. Videoǵa qarasaq, ol burylyp, anamdy bar kúshimen iterip jiberedi. Anam baspaldaqtan qulap túsip, qaita tura almady. Eń soraqysy – ol múlde kómektespedi, janyna da jaqyndamady”, – deidi Raisa KTK arnasyna bergen suqbatynda.
Onyń sózinshe, Biǵaisha Bektenbaevanyń densaýlyǵyna aýyr zaqym kelgen.
“Qos jambasyna temir plastina qoiyldy. Anamnyń jasy úlken bolǵandyqtan, bul jaraqat óte aýyr tidi. Qazir ol múlde júre almaidy, tósek tartyp jatyr. Jany qatty qinalyp jatyr. Biz jaqyn arada ońalatynyna úmit artyp otyrmyz. Meniń talabym – kináli adam jaýapqa tartylýy kerek. Saý adamdy múgedekke ainaldyrdy. Mundai adam nelikten qoǵamǵa qaýip tóndirip júrýi tiis?” – deidi ol.
Qazirgi tańda 83 jastaǵy Amantai qajy jýrnalistermen bailanysqa shyqpai, telefon qońyraýlaryna jaýap bermei júr. Belsendiniń ústinen politsiia qylmystyq is qozǵady.
