Bul týraly KTK habarlaidy.
Politseiler taǵy bir kúdiktige izdeý jariialaǵan. Qazir ustalǵandarǵa qatysty Qylmystyq kodekstiń tórt baby boiynsha qylmystyq is qozǵalyp, tergeý amaldary júrgizilip jatyr. Bir apta buryn Esik qalasynda bolǵan bul oqiǵany Jibek Mýsinovanyń anasy jasyrmai jaiyp salǵan edi. Beinejazba arqyly jurttan kómek suraǵan Gúlbadar Mýsinova qyzyn qorlaǵandardyń qatań jazalanýyn talap etip otyr.
Qoǵamdy dúrliktirip jibergen bul oqiǵa osydan bir apta buryn bolǵan eken. Iaǵni 14 tamyz kúni týystarynyń týǵan kúnin atap ótý úshin Esik qalasyndaǵy myna meiramhanaǵa kelgen Jibek Mýsinovany tórt jigit urlap áketken. Iaǵni soqtaldai azamattar otyz jastaǵy áieldiń aǵasyn uryp-soǵyp, ózin kólikpen alyp ketipti. Sodan kúdiktiler qorǵansyz kelinshekti jabylyp zorlap, bilgenderin istegen. Eń soraqysy – bul oqiǵanyń bári aýdandyq ishiki ister bóliminiń túbinde bolypty. Iaǵni tórt jigitten jábir kórgen qaryndasyn Bolat Mýsinov politsiia bólimshesinen taiaq tastam jerdegi kólik ishinen taýyp alǵan.
Bolat Mýsinov, Jibek Mýsinovanyń aǵasy:
-Kólikten úsh kisi shyqty. «Qaryndasym qaida?»-dep surap edim, «artqy oryndyqta otyr»-dedi. Ashyp qarasam jalańash otyrǵan qaryndasym: «Olar meni zorlady» dep aitty.
Osy sátte eki kúdikti qashyp ketken. Al qalǵan ekeýin Jibektiń aǵalary ustap, politseilerdiń qolyna tapsyrypty. Biraq tártip saqshylary olardy jibere salǵan. Sondyqtan jábirlenýshiniń anasy janaiqaiyn aityp, ǵalamtor arqyly videoúndeý jariialaǵan edi. Gúlbadar Mýsinovanyń beinejazbasy jelide qyzý talqylanyp, bul is oblystyq Ishki ister departamentiniń basshylyǵyna deiin jetken. Osydan keiin tártip saqshylary dereý úsh kúdiktini qamaýǵa alyp, taǵy bireýine izdeý jariialady.
Kóbeihan Nurahmet, Almaty oblystyq IID resmi ókili:
-Ustalǵandarǵa qatysty Qylmystyq kodekstiń tórt baby, iaǵni zorlaý, adam urlaý, buzaqylyq jáne kúsh qoldaný faktileri boiynsha qylmystyq is qozǵaldy. Qazir bul ispen Almaty oblystyq IID-ti tergeý basqarmasynyń tergeýshileri ainalysyp jatyr. Tórtinshi kúdiktiniń aty-jóni belgili. Ol da jaqynda qamaýǵa alynady.
Al zorlanǵan kelinshek qazir aýrýhanada jatyr eken. Qyzym qatty shoshynyp qalǵan deidi anasy.
Gúlbadar Mýsinova, Jibek Mýsinovanyń anasy:
-Jibekti birden dárigerge kórsetip, meditsinalyq tekseristen ótkizdik. Júike-júiesi buzylǵan eken. Sondyqtan ony Almatydaǵy emhanalardyń birine jatqyzyp, emdetip jatyrmyn.
Eń qyzyǵy osy oqiǵadan keiin bul úige shaqyrtýsyz keletin qonaqtardyń qatary kóbeigen. Iaǵni kúdikti jigitterdiń ata-analary kún saiyn keshirim surap, isti jyly jabý úshin qomaqty qarjy da usynǵan eken. Alaida Gúlbadar Mýsinova qyzyn qorlaǵandardy keshirmeimin deidi. Sondyqtan ashynǵan ana tórt jigittiń de qatań jazalanýyn talap etip otyr.
