بۇل تۋرالى كتك حابارلايدى.
پوليسەيلەر تاعى ءبىر كۇدىكتىگە ىزدەۋ جاريالاعان. ءقازىر ۇستالعاندارعا قاتىستى قىلمىستىق كودەكستىڭ ءتورت بابى بويىنشا قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر. ءبىر اپتا بۇرىن ەسىك قالاسىندا بولعان بۇل وقيعانى جىبەك مۋسينوۆانىڭ اناسى جاسىرماي جايىپ سالعان ەدى. بەينەجازبا ارقىلى جۇرتتان كومەك سۇراعان گۇلبادار مۋسينوۆا قىزىن قورلاعانداردىڭ قاتاڭ جازالانۋىن تالاپ ەتىپ وتىر.
قوعامدى دۇرلىكتىرىپ جىبەرگەن بۇل وقيعا وسىدان ءبىر اپتا بۇرىن بولعان ەكەن. ياعني 14 تامىز كۇنى تۋىستارىنىڭ تۋعان كۇنىن اتاپ ءوتۋ ءۇشىن ەسىك قالاسىنداعى مىنا مەيرامحاناعا كەلگەن جىبەك مۋسينوۆانى ءتورت جىگىت ۇرلاپ اكەتكەن. ياعني سوقتالداي ازاماتتار وتىز جاستاعى ايەلدىڭ اعاسىن ۇرىپ-سوعىپ، ءوزىن كولىكپەن الىپ كەتىپتى. سودان كۇدىكتىلەر قورعانسىز كەلىنشەكتى جابىلىپ زورلاپ، بىلگەندەرىن ىستەگەن. ەڭ سوراقىسى – بۇل وقيعانىڭ ءبارى اۋداندىق ىشىكى ىستەر ءبولىمىنىڭ تۇبىندە بولىپتى. ياعني ءتورت جىگىتتەن ءجابىر كورگەن قارىنداسىن بولات مۋسينوۆ پوليسيا بولىمشەسىنەن تاياق تاستام جەردەگى كولىك ىشىنەن تاۋىپ العان.
بولات مۋسينوۆ، جىبەك مۋسينوۆانىڭ اعاسى:
-كولىكتەن ءۇش كىسى شىقتى. «قارىنداسىم قايدا؟»-دەپ سۇراپ ەدىم، «ارتقى ورىندىقتا وتىر»-دەدى. اشىپ قاراسام جالاڭاش وتىرعان قارىنداسىم: «ولار مەنى زورلادى» دەپ ايتتى.
وسى ساتتە ەكى كۇدىكتى قاشىپ كەتكەن. ال قالعان ەكەۋىن جىبەكتىڭ اعالارى ۇستاپ، پوليسەيلەردىڭ قولىنا تاپسىرىپتى. ءبىراق ءتارتىپ ساقشىلارى ولاردى جىبەرە سالعان. سوندىقتان جابىرلەنۋشىنىڭ اناسى جانايقايىن ايتىپ، عالامتور ارقىلى ۆيدەوۇندەۋ جاريالاعان ەدى. گۇلبادار مۋسينوۆانىڭ بەينەجازباسى جەلىدە قىزۋ تالقىلانىپ، بۇل ءىس وبلىستىق ىشكى ىستەر دەپارتامەنتىنىڭ باسشىلىعىنا دەيىن جەتكەن. وسىدان كەيىن ءتارتىپ ساقشىلارى دەرەۋ ءۇش كۇدىكتىنى قاماۋعا الىپ، تاعى بىرەۋىنە ىزدەۋ جاريالادى.
كوبەيحان نۇراحمەت، الماتى وبلىستىق ءىىد رەسمي وكىلى:
-ۇستالعاندارعا قاتىستى قىلمىستىق كودەكستىڭ ءتورت بابى، ياعني زورلاۋ، ادام ۇرلاۋ، بۇزاقىلىق جانە كۇش قولدانۋ فاكتىلەرى بويىنشا قىلمىستىق ءىس قوزعالدى. ءقازىر بۇل ىسپەن الماتى وبلىستىق ءىىد-تى تەرگەۋ باسقارماسىنىڭ تەرگەۋشىلەرى اينالىسىپ جاتىر. ءتورتىنشى كۇدىكتىنىڭ ءاتى-جونى بەلگىلى. ول دا جاقىندا قاماۋعا الىنادى.
ال زورلانعان كەلىنشەك ءقازىر اۋرۋحانادا جاتىر ەكەن. قىزىم قاتتى شوشىنىپ قالعان دەيدى اناسى.
گۇلبادار مۋسينوۆا، جىبەك مۋسينوۆانىڭ اناسى:
-جىبەكتى بىردەن دارىگەرگە كورسەتىپ، مەديسينالىق تەكسەرىستەن وتكىزدىك. جۇيكە-جۇيەسى بۇزىلعان ەكەن. سوندىقتان ونى الماتىداعى ەمحانالاردىڭ بىرىنە جاتقىزىپ، ەمدەتىپ جاتىرمىن.
ەڭ قىزىعى وسى وقيعادان كەيىن بۇل ۇيگە شاقىرتۋسىز كەلەتىن قوناقتاردىڭ قاتارى كوبەيگەن. ياعني كۇدىكتى جىگىتتەردىڭ اتا-انالارى كۇن سايىن كەشىرىم سۇراپ، ءىستى جىلى جابۋ ءۇشىن قوماقتى قارجى دا ۇسىنعان ەكەن. الايدا گۇلبادار مۋسينوۆا قىزىن قورلاعانداردى كەشىرمەيمىن دەيدى. سوندىقتان اشىنعان انا ءتورت جىگىتتىڭ دە قاتاڭ جازالانۋىن تالاپ ەتىپ وتىر.
