Sarapshylar 1 AQSh dollarynyń baǵamyna qatysty aldaǵy bir aiǵa neǵurlym optimistik sipatta baǵa berse, al jyldyq boljamdy baǵam, kerisinshe pessimistik sipatqa ie. Qarjy naryǵynyń kásibi qatysýshylary arasynda saýalnama júrgizgen Qazaqstan qarjygerleri qaýymdastyǵy osylai deidi, dep jazady Dalanews.kz.
Qarjy naryǵynyń kásibi qatysýshylary bir aidan keiin, iaǵni aqpan aiynyń ortasynda 1 AQSh dollarynyń baǵamy 527,3 teńge bolady dep boljaidy. Buǵan deiingi saýalnamada atalǵan boljamdy kórsetkish 524,1 teńge deńgeiinde kórsetilgen. Al bir jyldan keiin 1 AQSh dollarynyń quny 552,5 teńge bolýy múmkin (buǵan deiin 545,2 teńge bolady dep boljanǵan).
"Sarapshylardyń ulttyq valiýta baǵamy boiynsha boljamy osymen segizinshi ai qatarynan nasharlaýda. Bul rette Reseige qarsy sanktsiialyq rejimniń qataia túsýi jáne rýbldiń álsireýi, damýshy elderdiń táýekeldik aktivteri men ekonomikasyndaǵy ótimdiliktiń neǵurlym qaýipsiz quraldarǵa aýysýy, munai baǵasynyń tómendeý yqtimaldylyǵy, boljamdy import kóleminiń ulǵaiýy (infraqurylymdyq jobalardy iske asyrý), Qazaqstannyń syrtqy boryshy boiynsha iri tólemder jasaýy (biyl Qarjy ministrliginiń eýroobligatsiialary boiynsha 2,5 mlrd dollarǵa tólem jasalýy tiis) syndy qaýip-qaterler eskerilýde", delingen Qazaqstan qarjygerleri qaýymdastyǵynyń túsiniktemesinde.
Aldaǵy jyldyń qorytyndysy boiynsha infliatsiia deńgeii 2024 jylmen salystyrǵanda joǵary bolady, - deidi sarapshylar: 8,6% ornyna 9,4%.
"Bul eldegi aqsha-nesie sharttaryn qatań saqtaý qajettiligine ákelip soqtyrýy múmkin. Bir jyldan keiin bazalyq mólsherleme 14% -dy quraýy múmkin", - deidi QQQ sarapshylary.
Aita ketsek,búgin Ulttyq bank shetel valiýtalary aiyrbasy tártibine qatysty birqatar ózgerister engizgeli jatqany málim boldy. Ortalyq bank ázirlegen qujat jobasyna sáikes, aqsha aiyrbastaý pýnktteri arqyly júrgiziletin operatsiialar boiynsha teńgege shetel valiýtasyn satyp alý baǵamynyń satý baǵamynan aýytqý shegi AQSh dollary úshin – 7 teńge, evro úshin – 10 teńge deiin belgileý usynylady.
