Talǵarda bir top buzaqynyń qolynan qaza tapqan marqum Sherzattyń ákesi Qarjaýbai Nurymov málimdeme jasady, dep habarlaidy Dalanews.kz.
“Qurmetti, qazaq eli! Sizderdiń aldaryńyzda basymdy iemin! Meni qoldap, balam úshin qol ushyn berip jatqandaryńyzǵa kóp raqmet! Men Qonaevtaǵy Almaty oblysynyń politsiia departamentiniń ǵimaratyna keldim. Ol jerde is oń jaǵynan qaralyp jatyr. Bizge advokattar kómektesýde. Marqum bolǵan Saltanattyń aǵasynyń da (Aitbek Amangeldi) kómegi bar. Ol kisige de erekshe raqmet! Alǵysym sheksiz”, - dedi ol.
Marqumnyń ákesi halyqtan kóteriliske shyqpaýyn ótindi.
“Ótinishim bar, halqym. Eshqandai mitingige, qantógis bolmasyn. Men bar jerde bir shoǵyrlanǵan adamdar kelip, sol sátti meniń dushpandarym paidalanýy múmkin. Kóterilis jasap, meni aiaqtan shalyp, baýyryma qastandyq jasaý úshin sondai bolýy múmkin. Sol sebepti halqym ótinip suraimyn, eshqandai kóterilis emes, óz qaǵidam: zań aiasynda durys, ádil sheshim suraimyn. Artyq eshteńe suramaimyn. Shyny kerek, qandai da bir aqparattar bolyp jatsa, ózim ǵana bólisemin. Videojazbaǵa, aýdiojazbaǵa, sýretter, fotolarǵa senbeńizder. Kim kelse de, qandai jaǵdai bolsyn sóilese alam, óz basyma jaýap bere alam. Al otbasymnyń jeke qaýipsizdigi ýaiymdatady”, - dedi Qarjaýbai Nurymov.
Onyń sózinshe, kúdiktilerdiń tarapynan birneshe ret qorqytý bolǵan.
“Meni bir emes, birneshe ret qorqytty. Alyp ketýler boldy. Telefonmen de. “Zańgermiz, advokatpyz, birge oqyp edik” dep kelip, aldap, meni dalaǵa shaqyryp alyp, qorqytýlar bolǵany ras”, - dedi marqumnyń ákesi.
Osy tusta ol ashyq sotty talap etetinin jetkizdi.
“Halqymnan suraitynym – esh qan tógilmesin. Ashyq sot bolýyn talap etem. Ashyq sot bolsa, oń sheshim bolady. Esh arandatýǵa túspeńizdershi. Analar jylamasyn, balalardyń qany tógilmesin. Baýyrlarym, jigitter, arandamaiyqshy, aldanyp qalmaiyq. Joǵarydaǵy aǵalar da zań aiasynda qolǵa alyp jatyr. Erteń Astanadan, IIM-nen adam keledi dep aityldy. Sol aitarym. Balam óldi. Endi men basqa balalardyń bolashaǵy jaqsy bolsyn dep tileimin. Nietim de, armanym da osy”, - dedi ol.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý izoliatoryna qamaýǵa alynǵan.
