Aqparatty Sputnik Qazaqstan saıty taratty.
“Bul suraq qazir kóp ata-anany alańdatyp otyr eken. Óıtkeni, mınıstrlikke qońyraý shalyp, suraq qoıǵan ata-analar kóp boldy. Biraq, 8 naýryz merekesine oraı, bizdiń qurmetti ustazdarǵa gúl syılamasyn degen qaýly bolǵan joq, bolmaıdy da, bolǵan da emes. Qazir biz tıisti organdarǵa hat jiberip, olardyń aımaǵynda sondaı qaýly boldy ma degen máseleni tekserip jatyrmyz. Al, Qazaqstan Respýblıkasynyń Bilim jáne ǵylym mınıstrligi búkil jergilikti organdarǵa, aýdandyq, oblystyq bilim basqarmalaryna mundaı qaýly joldaǵan joq. Buny resmı túrde málimdegimiz keledi”, — dedi Sýhanberdıeva búgin ortalyq komýnıkasıalar qyzmetinde ótken baspasóz máslıhatynda.
Aıta keteıik, áleýmettik jelide 8-naýryz merekesine oraı qazaqstandyq ustazdarǵa endi syılyq jasaýǵa, sonyń ishinde gúl syılaýǵa bolmaıdy degen aqparat taraǵan bolatyn. Iaǵnı, muǵalimderge tartý etilgen kez kelgen syılyq para bolyp esepteledi-mis.
