Májilis depýtaty Ashat Aimaǵambetov bilim berý salasyna qatysty mańyzdy zań qabyldanǵanyn aitty, dep habarlaidy Dalanews.kz.
Onyń sózinshe, bul zańda birqatar mańyzdy másele qamtylǵan. Sonyń biri - mektepterdiń kúrdeli jóndeýi.
"Prezident óz joldaýynda mektepterdiń ýaqtyly jóndelýin qamtamasyz etýdi tapsyrdy. Osyǵan orai biz jańa norma engizdik: endi Oqý-aǵartý ministrligi osy jóndeýlerdi qarjylandyrý erejesin bekitedi, al ákimdikter jyl saiyn mektepterdiń kúrdeli jóndeýine jáne rekonstrýktsiiasyna mindetti túrde qarjy bólýge tiis bolady. Bul – mektep ǵimarattarynyń apatty jaǵdaiǵa túspeýine baǵyttalǵan mańyzdy qadam", - dedi ol.
Depýtattyń aitýynsha, odan keiingi taǵy bir mańyzdy másele - birinshi synyp oqýshylaryn qoldaý.
"Jańa oqý jylynan bastap memlekettik tilde oqýǵa baratyn, biraq ázirge tildi tolyq meńgermegen balalar úshin arnaiy beiimdelgen baǵdarlama usynylady. Iaǵni olar qosymsha tildik sabaq ala alady. Maqsat aiqyn: balalar qatarynan qalyp qoimai, bilimdi jeńil ári kúizelissiz alýǵa tiis. Mundai tájiribe Finliandiia, Kanada, Estoniia jáne Germaniiada burynnan bar", - dedi Aimaǵambetov.
Jańa zańda JOO jáne básekelestik taqyryby da qamtylǵan.
"2027 jyldan bastap sapasyn is júzinde dáleldegen úzdik ýniversitetterge kóbirek erkindik beriledi: olar ózderi bilim berý baǵdarlamalaryn aiqyndap, ǵylymi dárejelerdi taǵaiyndai alady", - dep túsindirdi ol.
Onyń sózinshe, endi mektepter men balabaqshalardyń shtattyq kestesi jariia túrde qoljetimdi bolýǵa tiis.
"Mysaly qai balabaqshada qansha kúzetshi, áleýmettik pedagog nemese ádisker bar ekeni ashyq kórinetin bolady. Bul - artyq oryndar men "jumys istemeitin jandarǵa" qarsy jasalǵan naqty shara", - dedi ol.
Sonymen qatar, attestatsiiaǵa qatysty ózgeris bolmaq.
"Bilim uiymdarynyń memlekettik attestatsiiadan ótý tártibi ózgerdi. Sondai-aq, kolledjderdi reitingteý normasy engizildi: endi olardyń qarjylandyrýy sapasyna qarai bólinedi", - dedi ol.
