Búgin 2025-2026 oqý jylyna arnalǵan memlekettik bilim berý granttaryn taǵaiyndaý jónindegi Respýblikalyq komissiia óz jumysyn aiaqtady. Bul týraly QR Ǵylym jáne joǵary bilim ministri Saiasat Nurbek málimdedi, dep habarlaidy Dalanews.kz.
"Komissiia quramynda QR Parlamentiniń depýtattary, memlekettik organdar, bilim salasy kásipodaqtarynyń, "Atameken" ulttyq kásipkerler palatasynyń, joǵary oqý oryndary qaýymdastyǵynyń, qoǵamdyq uiymdardyń ókilderi boldy. Komissiia otyrystarynda úmitkerlerdiń ótinishteri qaralyp, memlekettik bilim berý granttaryn bólý qoldanystaǵy erejeler negizinde konkýrs tártibimen júzege asyryldy. Sapaly jáne qajyrly qyzmeti úshin komissiia múshelerine sheksiz alǵysymdy bildiremin", - dedi ministr.
Onyń aitýynsha, biylǵy jyly konkýrsqa qatysý úshin shamamen 113 myń ótinish qabyldandy. Talapkerler arasynda eń suranysqa ie bilim berý baǵyttary – "Pedagogikalyq ǵylymdar", "Injenerlik, óńdeý jáne qurylys salalary", sondai-aq "Aqparattyq-kommýnikatsiialyq tehnologiialar".
Grant taǵaiyndaý konkýrsynyń nátijeleri QR Ǵylym jáne joǵary bilim ministrliginiń, QR Ǵylym jáne joǵary bilim ministriniń, sondai-aq Ulttyq testileý ortalyǵynyń resmi aqparattyq kózderinde jáne áleýmettik jelilerinde jariialanady.
"Joǵary oqý oryndaryna talapkerlerdi qabyldaý protsesi 2025 jylǵy 25 tamyzǵa deiin aiaqtalady. Qymbatty talapker! Úlken ómir jolyndaǵy alǵashqy qadamdaryńyz sátti ári jemisti bolsyn! Joǵary oqý oryndarynyń qabyrǵasynda kezdeskenshe", - deidi Saiasat Nurbek.
Buǵan deiin Qańtar oqiǵasy kezinde qaza tapqandar men jaraqat alǵandardyń balalaryna tegin bilim berý granttary beriletini habarlanǵan.
