Búgin oblys ákimi Beibit Isabaev Qazaqstan Azamattyq aliansynyń prezidenti Baný Nurǵazievamen jáne Taldyqorǵanda ótip jatqan azamattyq forýmnyń basqa da birqatar spikerlerimen kezdesý ótkizdi. Atap ótsek, «Azamattyq qoǵam 2.0: memlekettik organdar men ÚEU arasyndaǵy ózara is-qimyldyń innovatsiialyq úlgileri – óńirlik damýdyń draiveri» atty aýqymdy azamattyq forým biylǵy jylda alǵash ret Jetisýda ótkizilip otyr, – dep habarlaidy Dalanews.kz
Resmi qonaqtardy qarsy alǵan Beibit Isabaev óńirdegi azamattyq institýtpen birlesip júrgizilip jatqan jumystarǵa toqtaldy.
- Memleket basshysy Qasym-Jomart Toqaev ádilettilik, ashyqtyq jáne qoǵammen keri bailanysty óziniń saiasi baǵytynyń negizgi ózegi retinde belgiledi. Prezidentimizdiń «Halyq únine qulaq asatyn memleket» tujyrymdamasy — bizdiń kúndelikti jumysymyzdaǵy negizgi ustanym. Al «Adal eńbek – Adal azamat – Adal tabys» qoǵam qundylyǵyn qalyptastyratyn basty baǵdar. Bul jolda azamattyq qoǵam institýttarynyń, sonyń ishinde úkimettik emes uiymdar, kásibi sarapshylar men qoǵamdyq birlestikterdiń róli zor. Biz sizdermen birge qoǵamda saiasi, turmystyq jáne ekologiialyq mádenietti qalyptastyrý, rýhaniiatty damytý boiynsha jumys júrgizip kelemiz jáne tutastai alǵanda, eń aldymen halyqtyń ómir súrý deńgeiin arttyrýǵa baǵyttalǵan áleýmettik mańyzy bar mindetterdi birlesip sheshemiz, - dedi B.Isabaev.
Belgili bolǵandai, óńirde 578 úkimettik emes uiym, 22 etnomádeni birlestik, saiasi partiialardyń 7 óńirlik filialy, 14 salalyq kásipodaq birlestigi, 43 buqaralyq aqparat quraly bar. Quramynda 176 múshesi bar 11 qoǵamdyq keńes jumys isteidi, onyń 80% – azamattyq qoǵam ókilderi. Sondai-aq 55 konsýltativtik-keńesshi organnyń quramyna azamattyq sektordyń 149 ókili kiredi.
Óz kezeginde Qazaqstannyń Azamattyq aliansynyń prezidenti Baný Nurǵazieva jergilikti atqarýshy organdar men azamattyq sektor arasyndaǵy ózara is-qimyl baǵyttaryn keńeitý úshin 2023 jyldan bastap biryńǵai tujyrymdamasy bar azamattyq forýmdar ár óńirde, al qorytyndy forým elordada ótetinin atap ótti. Biylǵy jyldyń alǵashqy forýmy Jetisý oblysynda ótip jatqanyn tilge tiek etip, ol aimaq basshylyǵyna azamattyq qoǵammen tiimdi áriptestikti nyǵaitýǵa qosqan úlesi úshin alǵysyn bildirdi. Ol sondai-aq mundai forýmdardyń ashyq azamattyq qoǵamdy qalyptastyrýǵa baǵyttalǵan tiimdi alańǵa ainalǵanyn da basa aitty.
Parlament Senatynyń depýtaty, Ulttyq Quryltai tóraǵasynyń orynbasary Bibigúl Jeksenbai óńirde azamattyq sektordy qoldaýdyń oń tájiribesin qalyptasqanyn jetkizdi.
Óz kezeginde oblys ákimi barlyq usynylǵan jobalarǵa qatysty sheshimder birlesip qabyldanatynyn, eń bastysy usynystardyń qoǵamǵa tiimdi ári paidaly bolǵany mańyzdy ekenin aitty. Máselen, óńirde azamattyq sektormen birlesip kóshpeli ońaltý qyzmetin kórsetý, «Invataksi» qyzmetiniń jumysy jáne taǵy basqa jobalar iske asyrylýda. Úkimettik emes uiymdardy qoldaý óńirde oqýshylardy jan-jaqty damytý men áleýmettendirý baǵytynda oblys basshylyǵynyń bastamasymen qolǵa alynǵan «Ádep-quqyqtyq tárbie jónindegi mentor» jobasynyń iske asyrylýy barysynda da aiqyn kórinýde.
Júzdesýde QR Mádeniet jáne aqparat ministrligi Azamattyq qoǵam isteri komitetiniń tóraǵasy Gúlbara Beketqyzy jastarmen jumys isteý jáne eriktiler qozǵalysyn damytý baǵyttaryna toqtaldy.
Parlament Májilisiniń depýtaty Marat Bashimov pen «Qazaqstan halqyna» qoǵamdyq qorynyń Basqarma tóraǵasy Lázzat Shyńǵysbaeva azamattyq qoǵamnyń damýyna qatysty pikir bólisti.
Kezdesý sońynda Beibit Isabaev erteń plenarlyq otyrysy men ÚEU-nyń tabysty jobalarynyń kórmesimen jalǵasatyn azamattyq forým jumysyna tabys tiledi, sondai-aq forým barysynda ázirlengen pármendi usynystar men bastamalardy jergilikti jerlerde odan ári iske asyrý nazarǵa alynatynyn jetkizdi.
