Shymkent ákimdigi ókilderi Rýslan Berdenovke jasalǵan shabýylǵa qatysty pikir bildirdi,- dep habarlaidy Dalanews.kz.
Qala ákiminiń orynbasary Sársen Quranbektiń aitýynsha, oqiǵa kezinde Shymkent ákimi, onyń orynbasarlary men ákimdik apparaty óz jumys oryndarynda, iaǵni ákimdik ǵimaratynda bolǵan.
Qaiǵyly jaǵdai bolǵan sátte jedel járdem men politsiia shaqyrylyp, Rýslan Berdenov dereý aýrýhanaǵa jetkizilgen. Qaskói oqiǵa ornynda ustalǵan. Berdenovke birden ota jasalyp, ol uzaqqa sozylǵan. Qala ákimi men onyń komandasy ota tolyq aiaqtalǵannan keiin ǵana aýrýhanadan ketken.
Sársen Quranbek ákimdik pen baspasóz qyzmetiniń ne sebepti birden málimdeme jasamaǵanyn da túsindirdi. Onyń sózinshe, mundai qylmystyq oqiǵalarǵa quqyq qorǵaý organdary jaýapty bolǵandyqtan, alǵashqy resmi aqparatty solar beredi. Al densaýlyq jaǵdaiyna qatysty túsinikteme berý densaýlyq saqtaý salasynyń quzyrynda.
"Qazir tergeý jumystary júrip jatyr. Bul is prokýratýranyń baqylaýynda. Biz qylmys jasaǵan adamnyń sebebi jaily qandai da bir pikir bildire almaimyz. Tergeý aiaqtalǵan soń qajet aqparatty Politsiia departamentinen ala alasyzdar", – dedi ol.
Sonymen qatar, ol jalǵan jáne rastalmaǵan málimetterdi taratpaýǵa shaqyrdy. Onyń aitýynsha, túrli qaýesetter taraǵanymen, tek tergeý nátijesi naqty shyndyqty aiqyndaidy.
Ákimdik mańyndaǵy atys týraly
21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Politsiia málimetinshe, kúdikti ustalyp, ýaqytsha ustaý izoliatoryna qamalǵan, bul derek boiynsha qylmystyq is qozǵalǵan.
Al Densaýlyq saqtaý ministrligi málimetinshe, Rýslan Berdenovke operatsiia jasalǵan, ómirine qaýip joq.
"Shymkent qalasy ákiminiń orynbasary oq jaraqatymen qalalyq aýrýhanaǵa tústi. Oǵan shuǵyl operatsiia jasaldy. Operatsiia barysynda qan ketý toqtatyldy, zaqym qalpyna keltirildi. Ómirine qaýip joq", - dep jazylǵan habarlamada.
Málimetke súiensek, onyń jaǵdaiy turaqty aýyr dep baǵalanady. Sheneýnik dárigerlerdiń turaqty baqylaýynda jáne qajet meditsinalyq kómekti alyp jatyr.
