Shymkent qalasynyń qylmystyq ister jónindegi mamandandyrylǵan aýdanaralyq sotynda qala ákiminiń orynbasary Rýslan Berdenovke jasalǵan qastandyq týraly is boiynsha sot otyrysy bastaldy, dep habarlaidy Dalanews.kz.
Búgingi sot otyrysynda ne bolyp jatyr?
Aiyptalýshy Ernar Jiembai bul áreketke qyzmet barysyndaǵy arazdyq emes, jeke bastyń máselesi, anyǵyraq aitqanda qyzǵanysh sebep bolǵanyn málimdedi.
Jiembai ózine taǵylǵan aiypty moiyndap, el arasynda taraǵan túrli qaýesetti joqqa shyǵarýǵa tyrysty.
"Muny halyqtyń, qoǵamnyń anyq bilgenin qalaimyn. Bul jaittyń jumyspen bailanysy joq. Barlyǵy qyzǵanyshtan týyndady", – dedi ol.
Aiyptalýshynyń aitýynsha, áielimen altynshy synyptan beri tanys. Ol jubaiynyń adal ekenine senimdi ekenin, áleýmettik jelide tarap júrgen áńgimelerdiń shyndyqqa janaspaitynyn jetkizdi.
"Áielim – tárbieli, kórgendi otbasynan shyqqan adam. Onyń bóten er azamattarmen orynsyz qarym-qatynas jasaǵanyn eshqashan kórmeppin", – dedi Jiembai.
Jiembai otbasynda aýtizm diagnozymen týǵan uly bar ekenin aitty. Bir kóshede dál osyndai diagnozy bar bala ósirip otyrǵan otbasy turǵan. Olar Berdenovtiń týystary eken. Osy sebepten Jiembaidyń áieli osy otbasynyń múshelerimen jaqyn aralasqan, balalaryn birge damytý ortalyqtaryna aparyp júrgen.
"Áielim Berdenovpen birneshe otyrysta dastarhandas bolǵan", – deidi aiyptalýshy.
Oqiǵaǵa túrtki bolǵan jaittardyń biri Jiembai áieliniń telefonyna Berdenov habarlama jazyp, "sen ádemisiń" degeni ekenin alǵa tartty.
"Áielimniń telefonynan Rýslan Berdenovtiń habarlamasyn kórip qaldym. "Sen ádemisiń" dep jazǵan, laik qoiǵan. Áýelde jaman oiym bolǵan joq. Men de qaryndastaryma osyndai sóz aitamyn", – deidi ol.
Aiyptalýshy shabýylǵa taǵy bir sebep bolǵan oqiǵany baiandady. Aitýynsha, oqiǵadan bir kún buryn Berdenovtiń qabyldaýyna barmaq bolyp, áielinen kiimin daiyndaýdy suraǵan. Biraq úiine kelgende áieli kiimdi ázirlep úlgermegen, tipti kóilegin útikpen kúidirip alǵanyn kórgen.
"Men keshigip jatyrmyn. Al sol kezde áielim maǵan Rýslan Berdenovtiń qalai kiinetinin aita bastady. Onyń bes million teńgelik kostiýmderi unap qalypty. Bul da qastandyq jasaýyma sebep boldy dep oilaimyn", – dedi Jiembai sot otyrysynda.
Is sotta memlekettik tilde, ashyq túrde qaralyp jatyr.
Buǵan deiingi jaǵdai
Eske salaiyq, buǵan deiin Rýslan Berdenov sotqa kelýge mindettelgeni habarlandy. Sot otyrysynda sýdia Ábinur Qarabaev Rýslan Berdenovti 6 tamyzǵa josparlanǵan negizgi sot protsesine mindetti túrde qatysýǵa shaqyrdy.
Sebebi Rýslan Berdenov aldyn ala tyńdaýǵa ózi kelmegen edi. Onyń ókili Rýslan Berdenov em qabyldap jatqanyn málimdedi.
Ákimdik mańyndaǵy atys týraly
21 sáýirde Shymkent qalasy ákimdigi ǵimaraty mańynda atys boldy. Saldarynan Rýslan Berdenov jaraqat aldy. Artynsha kúdikti ustalyp, ýaqytsha ustaý izoliatoryna qamaldy, bul derek boiynsha qylmystyq is qozǵaldy.
Bul is boiynsha basty kúdikti - Ernar Jiembai. Ashyq formatta ótken aldyn ala tyńdaý kezinde sýdia Jiembaidyń sot protsesi barysynda ózin túsirýge qarsy ekenin jetkizdi.
