Benzin tapshylyǵy – Bozymbaevqa sógis jariialanbaq
Premer-Ministr buǵan qosa energetika vitse-ministri Áset Maǵaýovty qyzmetinen bosatyp, "QazMunaiGaz" ulttyq kompaniiasynyń vitse-prezidenti Daniiar Berlibaevti ornynan alýǵa tapsyrma berdi.
Úkimet jiynynda Qazaqstandaǵy benzin tapshylyǵyna qatysty sóilegen Qanat Bozymbaev elde benzin "tapshylyǵy joǵyn" aityp, bul sózdi qoldanýdyń múldem durys emesin málimdegen. "Keshegi kúni elde aimaqtarda, munai bazalarynda jáne jolda 138 myń tonna AI-92 markaly benzini boldy. Baǵa eń aldymen naryqta Reseidiń qymbat benzininiń úlesi artqandyqtan kóterildi" – degen Bozymbaev.
Biraq Saǵyntaev ministrdiń túsiniktemesin "syltaý, jaýapkershilikten qashý" dep, qabyldai almaitynyn aitty. Ol Bozymbaev sógis jariialaý týraly Prezidentke usynys jasaitynyn, al vitse-ministr Áset Maǵaýovty qyzmetinen bosatatyny týraly sheshim qabyldaǵanyn aitty.
Premerdiń sózinshe, ministrlik Pavlodar munai óńdeý zaýytynda jóndeý jumystary kóktemnen kúzge aýystyrylatynyn, eki munai óńdeý zaýyty birinen soń biri jóndeýge jabylatynyn bilgenimen, tiisti shara jasamaǵan.
Qazaqstanda birneshe kúnnen beri benzin tapshylyǵy baiqalyp otyr. "Qazmunaigaz" Ulttyq munai kompaniiasynyń janarmai beketinde otyndy tek talonmen berip jatyr. Kei beketterde kólikter uzyn-sonar kezekte tur.
