Búgin Qostanai politsiiasy “Fond-biýro rassledovaniia korrýptsii” telegram arnasynyń basshysy Kirill Pavlovty ustady. Bul týraly bloger óziniń Facebook paraqshasynda málimdedi, dep habarlaidy Dalanews.kz.
“Men Qostanaiǵa issaparmen bardym. Tańerteń politsiia páterime kelip, meni “túsinikteme alamyz” degen jeleýmen politsiia basqarmasyna alyp ketti”, — dep jazdy Pavlov.
Dalanews.kz tilshisi oqiǵanyń mán-jaiyn bilý úshin blogerge habarlasty. Pavlovtyń aitýynsha, oǵan Qazaqstan Respýblikasynyń Ákimshilik quqyq buzýshylyq kodeksiniń 456-2-babynyń 4-bólimi boiynsha is qozǵalǵan.
“Qazir politsiia ǵimaratynda sot ótkizý josparlanyp otyr”, — dedi ol.
Blogerdiń sózinshe, ýchaskelik inspektor ne úshin onlain-platforma qoldanýshylaryna arnalǵan normany qoldanyp jatqandaryn túsindirmegen. Sondai-aq resmi buiryqtan alynǵan aqparatty jariialaǵany úshin onyń deregi nelikten jalǵan dep tanylǵanyn da naqtylamaǵan.
Istiń mán-jaiy
Is "Sunkar Eavision International LLP" JShS kompaniiasynyń aryzy boiynsha qozǵalǵan. Alǵashynda aryz bas redaktorǵa qarsy berilse, keiin QR ÁQBK 456-2-bap ("Jalǵan aqparat taratý") boiynsha Pavlovqa qatysty ákimshilik is ashylǵan.
Kompaniia jýrnalisterdi drondar baǵasyn burmalady dep aiyptaǵan: firma jariialaǵan aqparat boiynsha dron 7,1 mln teńgege usynylǵan, biraq kelisim 8 mln teńgege jasalǵan.
Degenmen bul málimet resmi hattan alynǵan (aýyl sharýashylyǵy ministrliginiń memlekettik inspektsiia komiteti tóraǵasynyń mindetin atqarýshy S. Qanybekovtiń 2024 jylǵy 10 jeltoqsandaǵy №18-18/1602-vn haty) jáne qazynalyq memlekettik satyp alý portalynda jariialanǵan.
"Is materialy bastapqyda Astana prokýratýrasyna jiberilgenimen, belgisiz sebeptermen qaitadan politsiia bóliminde qaralýda", - deidi ol.
Istiń negizgi sebebi
Pavlovqa qatysty is Qazaqstannyń Ákimshilik quqyq buzýshylyqtar kodeksiniń 456-2-babynyń 4-bólimi boiynsha qozǵalǵan. Bul bap bir jyl ishinde ákimshilik jaýapkershilikke tartylǵan adamǵa ekinshi ret qoldanylatyn normany qamtidy.
Istiń negizgi sebebi - Pavlovty buryn shegirtke shabýyly týraly halyqaralyq derekterdi resmi statistikamen salystyryp jariialaǵany úshin aiyptaý. Sol kezde jýrnalistke aiyppul salynǵan edi.
“Nelikten 4-bólim (onlain-platforma qoldanýshylary) qoldanylady? Nege litsenziiasy bar BAQqa (1-bólim) qatysty normany qoldabai otyr? Buny túsindirmeidi. Resmi buiryqtyń derekteri qai jerde jalǵan dep esepteletini de aitylmaidy”, – dedi bloger.
Pavlov aiyptaýlarmen kelispeitinin, quqyq buzbaǵanyn, sondai-aq sotqa BAQ qatysýyn qamtamasyz etý úshin ótinish beretinin málimdedi.
