Belgili aitys uiymdastyrýshysy, Qazaqstannyń eńbek sińirgen qairatkeri Júrsin Erman birneshe jyl buryn dertke shaldyǵyp, densaýlyǵy syr bergen bolatyn. Shetel asyp, em qabyldap kelgen aqyn qazirgi tańda arbasyn tastap, aiaqqa turǵan, dep habarlaidy Dalanews.kz.
Bul týraly 73 jasqa qadam basqan aqyn "Tańsholpan" baǵdarlamasyna bergen suqbatynda málimdedi.
Onyń aitýynsha, qazirgi tańda densaýlyǵy jaqsaryp qalǵan.
"Shetelge de, Astana men Almatyǵa da baryp emdeldim. Almatyda «Jalyn» degen zaýyt bar eken. Tek Baqanastyń kúrishiniń qaýyzynan kapsýla jasap shyǵarady eken. Toǵyz jyl zerttep, daýa tapqan eken. Sonyń basshysyna bir shal aian berip, «Dárińdi Júrsin Ermanǵa aparyp ber. Soǵan em bolady» dep aitty dedi de, ákelip berdi. Sony ishkeli qan qysymym túsip, qan quramynan qant azaiyp, aiaǵymdy bastym. Taiaǵyma súienip, eptep júremin. Qansha halyq maǵan tilektes bolyp, saýlyǵymdy tiledi. Sonyń da bir áseri tigen shyǵar dep oilaimyn", - dedi Júrsin Erman.
Eske salaiyq, birneshe jyl buryn aitys uiymdastyrýshysy jansaqtaý bólimine túskeni jaily aqparat taraǵan bolatyn. Keiinirek Júrsin Ermannyń qyzy ákesiniń jaǵdaiy týraly baiandaǵan bolatyn. Sonymen qatar aqyn óziniń Eýropaǵa emdelýge ketetini jaily aqparatty da rastap, keiinirek Jeneva qalasynan oqyrmandaryna sýretin de joldaǵan edi.
