Jańa Konstitýtsiia kúshine engennen keiin Qazaqstan saiasi jáne ekonomikalyq jańǵyrýdyń jańa kezeńine qadam basty, dep habarlaidy dalanews.kz.
Premer-ministr Oljas Bektenovtiń tóraǵalyǵymen Quryltai sailaýynan keiin jańartylǵan quramdaǵy Úkimettiń alǵashqy otyrysy ótti. Jiynda «Qazaqstan Respýblikasynyń Úkimeti týraly» Konstitýtsiialyq zańǵa sáikes Úkimettiń jańa múshesi, tótenshe jaǵdailar ministri Murat Muhanov ant berdi.
Otyrysta Oljas Bektenov jańa Konstitýtsiianyń kúshine enýi el úshin mańyzdy tarihi kezeń ekenin atap ótti. Onyń aitýynsha, endigi mindet – saiasi ózgeristermen qatar, áleýmettik-ekonomikalyq damýdy qamtamasyz etý.
«Jańa Konstitýtsiia zańdy kúshine enip, memleketimiz saiasi jáne ekonomikalyq jańǵyrýǵa qadam basqan tarihi kezeńde elimizdiń odan ári áleýmettik-ekonomikalyq damýyn qamtamasyz etý úshin bárimiz jan-jaqty sharalardy qabyldaýǵa mindettimiz», – dedi Premer-ministr.
Bektenov Úkimet múshelerine barlyq baǵyt boiynsha Memleket basshysy qoiǵan mindetterdi júieli ári keshendi túrde oryndaýdy tapsyrdy. Ol «Zań men Tártip» jáne «Taza Qazaqstan» konstitýtsiialyq qaǵidattary Úkimet jumysynda basty orynda turýy kerektigin aitty.
Premer-ministr Úkimet jumysy jańa kezeńniń talaptaryna sáikes jedel ári nátijeli júrýi qajet ekenin atap ótti.
«Qazir tolyq jaýapkershilikti moinymyzǵa alyp, naqty nátijelerge qol jetkizý úshin qajetti sheshimderdi jedel qabyldaityn ýaqyt. Bárimiz Prezidenttiń joǵary senimin tolyǵymen aqtaýymyz kerek», – dedi Oljas Bektenov.
Osylaisha, jańartylǵan quramdaǵy Úkimettiń alǵashqy otyrysynda jańa Konstitýtsiia jaǵdaiyndaǵy memlekettik basqarýdyń basymdyqtary men Úkimet aldynda turǵan mindetter aiqyndaldy.
