Qazaqstan Respýblikasynyń Premer-ministri Oljas Bektenov Shell kompaniiasy barlaý jáne óndirý bólimshesiniń prezidenti Piter Kostellomen kezdesti. Birlesken munai-gaz jobalaryn júzege asyrý máseleleri jáne yntymaqtastyq keleshegi talqylandy, dep habarlaidy Dalanews.kz.
Kezdesýge Qazaqstandaǵy kontsernniń aǵa vitse-prezidenti ári tóraǵasy Áli ál-Janabi, negizgi elder men Namibiiadaǵy barlaý jónindegi vitse-prezident Siýzann Kýgan qatysty.
Shell Qazaqstanda munai-gaz salasyndaǵy birqatar iri bastamany, sonyń ishinde KQK, Soltústik Kaspii, Qarashyǵanaq jobalaryna qatysý, qysqy dizel otynyn óndirý boiynsha PMHZ qondyrǵysyn jańǵyrtý, sondai-aq jer qoinaýyn geologiialyq barlaý jáne ǵylymi zertteýdi júzege asyrýda.
"Kezdesý barysynda Qarashyǵanaq ken ornynda qýaty jylyna 4 mlrd tekshe metrdi qamtityn gaz óńdeý zaýytynyń qurylysyna nazar aýdarylyp, ony júzege asyrýdyń mańyzdylyǵy atap ótildi. Sonymen qatar Qashaǵan ken ornyn igerý jumystary da talqylandy. Taraptar qýaty jylyna 2,5 mlrd tekshe metrdi qamtityn GÓZ salýdy jáne jańa alańdardy igerýdi kózdeitin 2A jáne 2B kezeńderin iske asyrýdy jedeldetý josparlaryn qarady", delingen Úkimet baspasóz qyzmetiniń habarlamasynda.
Premer-ministr Qazaqstan Úkimetiniń odan ári ózara tiimdi yntymaqtastyqqa daiyn ekenin jetkizdi.
