Premer-ministr Oljas Bektenov Qazaqstanda BYD elektromobillerin shyǵarý jobasyn jedeldetýdi tapsyrdy, dep habarlaidy dalanews.kz.
Bul másele Úkimet otyrysynda avtomobil ónerkásibin damytý taqyryby talqylanǵan kezde kóterildi, dep habarlaidy Dalanews.
Úkimet basshysy álemdegi jetekshi elektromobil óndirýshilerimen yntymaqtastyqty kúsheitýdiń mańyzyn atap ótip, Qazaqstanda BYD zaýytyn ashýǵa Úkimet múddeli ekenin aitty.
«Biz Qazaqstanda BYD elektromobilderin shyǵaratyn zaýyttyń ashylýyna múddelimiz. Úkimetten qajetti qoldaý kórsetiledi, osy jobany júzege asyrýdy jedeldetýdi suraimyn», – dedi Oljas Bektenov.
Óz kezeginde «Astana Motors» kompaniialar tobynyń tóraǵasy Nurlan Smaǵulov biyl BYD avtobýstaryn shyǵarý máselesi pysyqtalyp jatqanyn, al kelesi jyly kompaniia jeńil avtokólikter óndirisin igerýdi josparlap otyrǵanyn aitty.
«BYD – gibridti jáne tolyq elektrli kólikter shyǵaratyn biregei kompaniia. Kompaniiamyz tutynýshylar men ekonomika suranysyna sai bolý úshin BYD avtokólikterin óndirýdi igerýi qajet», – dedi Nurlan Smaǵulov.
Úkimettiń málimetinshe, búginde BYD Qazaqstandaǵy jańa energiia kózderin paidalanatyn avtomobilder naryǵynda kósh bastap tur. Biylǵy alǵashqy alty aida brendtiń 2 myńnan astam kóligi, onyń ishinde 795 elektromobil satylǵan.
Distribiýtordyń josparyna sáikes, jyl sońyna deiin satylym kólemi 6,5 myń kólikke, al 2027 jyly 12 myń avtomobilge deiin jetkizilmek.
